Në Teheran, qytetarë iranianë u mblodhën në rrugë në orët e para të mëngjesit të së mërkurës, pas njoftimit të armëpushimit, ndërsa një pjesë e tyre shprehën skepticizëm për marrëveshjen.
Pamjet nga vendi i ngjarjes tregojnë disa persona duke djegur flamuj të Shteteve të Bashkuara dhe Izraelit, një veprim që shihet shpesh në tubimet pro-regjimit në Iran. Të tjerë valëvitnin flamurin iranian dhe mbanin fotografi të Mojtaba Khamenei dhe babait të tij, Ali Khamenei.
“Amerika e ka treguar veten njëqind herë deri më tani, ne kemi shkuar në tryezën e negociatave dy herë kur na sulmoi”, tha një grua në vendngjarje, sipas Reuters, duke shtuar se SHBA-të mund ta përdorin këtë armëpushim për të “rifuqizuar veten”.
“A do të ndryshojë natyra e Amerikës? Nuk kam asnjë ide pse ata e kanë pranuar… si gjithmonë, ata duan të fitojnë kohë për Izraelin”, tha ajo.
Një grua tjetër vuri në pikëpyetje arsyet pse Irani duhet të shpallë një armëpushim dhe pse duhet të rihapë Ngushticën e Hormuzit, raportoi Reuters.
Sipas CNN, në javët e fundit, figura të larta të regjimit iranian kanë shprehur vazhdimisht hezitim për t’i besuar SHBA-së në negociata, duke theksuar se Irani ishte sulmuar ndërsa po negocionte me Uashingtonin, si në fillim të luftës aktuale, ashtu edhe gjatë konfliktit 12-ditor të vitit të kaluar.
