Inspektorati Kombëtar i Mbrojtjes së Territorit ka ndërhyrë këtë të premte për shembjen e objektit të fundit për hapjen e rrugës lidhëse mes Transballkanikes dhe Portit të Vlorës, në lagjen “1 Maj”. Godina 3-katëshe u prish me mjete të rënda, duke i hapur rrugë përfundimit të një segmenti për qarkullimin në zonë.
Sipas burimeve zyrtare, vonesat në ndërhyrje kanë ardhur si pasojë e kundërshtimeve nga ana e pronarëve të objektit. Ata kishin hapur çështje gjyqësore duke mos rënë dakord me vlerën e dëmshpërblimit të ofruar.
