Të paktën 11 drejtues të automjeteve janë arrestuar dhe proceduar penalisht, pasi akuzohen se kanë tentuar të korruptojnë efektivët e policisë rrugore Durrës këto ditë, me qëllim shmangien e gjobave.
I fundit u arrestua një 38-vjeçari që iu ofroi para punonjësve të policisë që e konstatuan duke drejtuar automjetin, në gjendje të dehur.
“Gjatë patrullimit me objektiv parandalimin e aksidenteve dhe ndëshkimin e shkelësve të rregullave të qarkullimit rrugor, shërbimet e Policisë Rrugore të Durrësit i bënë shenjë ndalimi, në aksin rrugor “Golem-Plepa”, automjetit me drejtues shtetasin L. K., 38 vjeç. Nga kryerja e testit të alkoolit, drejtuesi i automjetit rezultoi në gjendje të dehur”, tha policia vendore.
Gjatë veprimeve të punonjësve të Policisë, drejtuesi i automjetit iu ka ofruar atyre 5 000 lekë, me qëllim shmangien e procedurave ligjore.
Në përfundim të veprimeve 38-vjeçari banues në Tiranë, u arrestua në flagrancë për veprat penale “korrupsioni aktiv i personave që ushtrojnë funksione publike” dhe “drejtimi i automjeteve në mënyrë të parregullt”. Materialet procedurale iu referuan Prokurorisë së Durrësit, për veprime të mëtejshme.
