Libri i kujtimeve i aktorit të ndjerë Eric Dane, i titulluar “My Book of Days: A Memoir in Moments”, do të publikohet më 3 nëntor, pasi ai vendosi ta përfundonte dorëshkrimin edhe pse ishte diagnostikuar me sëmundjen e rëndë ALS në vitin 2023.
Sipas një njoftimi të publikuar nga Penguin Random House, aktori dëshironte që vajzat e tij dhe lexuesit të kishin mundësinë të lexonin fjalët e tij edhe pas vdekjes.
“Eric donte që vajzat dhe lexuesit të kishin këto fjalë. Publikimi i librit sipas planit i lejon atij të vazhdojë të flasë me zërin e tij, me qartësinë dhe guximin që e karakterizonte”, thuhet në njoftim.
Botuesit shtuan se Dane punoi me dorëshkrimin deri në ditët e fundit të jetës.
Libri do të publikohet nga imprinti The Open Field, që drejtohet nga gazetarja dhe autorja Maria Shriver, e cila u shpreh se është e nderuar që aktori zgjodhi ekipin e saj për të sjellë në jetë këtë projekt.
“Ai më tha se donte që familja e tij të dinte sa shumë i donte dhe të linte pas një histori për të cilën ata do të ishin krenarë”, tha Shriver.
Aktori, i njohur për rolet në “Grey’s Anatomy”, “Euphoria” dhe filmin “Bad Boys: Ride or Die”, ndërroi jetë më 19 shkurt, në moshën 53-vjeçare, pas një beteje 10-mujore me sëmundjen neurodegjenerative.
Në një deklaratë të dhënë para vdekjes së tij, Dane kishte treguar pse vendosi ta shkruante librin:
“Çdo mëngjes zgjohem dhe më kujtohet menjëherë se kjo është reale — kjo sëmundje, kjo sfidë. Pikërisht për këtë po e shkruaj këtë libër. Dua të kap momentet që më kanë formuar, ditët e bukura dhe ato të vështirat.”
Sipas përshkrimit zyrtar, libri do të trajtojë periudhën e tij të vështirë në fillimet e karrierës në Hollywood, luftën për të gjetur qetësi pas problemeve me varësinë dhe perspektivën e re që mori pasi u diagnostikua me ALS.
