Një vatër zjarri është shfaqur në një apartament në një pallat të vjetër në lagjen "5 Maji" në Elbasan, duke shkaktuar panik te banorët e zonës. Menjëherë pasi janë njoftuar, dy automjete të shërbimit zjarrfikës kanë mbërritur në vendngjarje dhe ndërhynë me shpejtësi për të neutralizuar flakët, duke e vënë situatën nën kontroll brenda pak minutash.
Sipas verifikimeve paraprake, shkaku i incidentit dyshohet të ketë qenë një defekt në sistemin e aspirimit të apartamentit. Fatmirësisht, nuk raportohet për persona të lënduar dhe banorët kanë qenë jashtë rrezikut për jetën.
