Gjykata e Durrësit ka caktuar masën e sigurisë “arrest me burg” ndaj Elton Varakut, ish-drejtor i Autoriteti Kombëtar i Ushqimit. Ai akuzohet nga prokuroria për shkatërrim prone dhe kanosje. Sipas dosjes hetimore, pas vendimit për largimin nga detyra, ai është rikthyer në ambientet e institucionit, ku dyshohet se ka dëmtuar pajisje zyre, përfshirë kompjuterë, si dhe ka përdorur gjuhë kërcënuese ndaj punonjësve. Policia ka ndërhyrë pas njoftimit dhe e ka arrestuar në vendngjarje.
Në sallën e gjyqit, Varaku ka kërkuar falje për incidentin. Avokati i tij e ka cilësuar ngjarjen si një reagim të çastit. Varaku, me origjinë nga Shijaku, ka mbajtur poste drejtuese në Durrës gjatë viteve të fundit. Hetimet për zbardhjen e plotë të rrethanave vijojnë.
