Regjistrime audio të padëgjuara më parë të Michael Jackson, ku ai shpreh mendimet e tij më “intime” rreth fëmijëve, do të publikohen në një dokumentar të ri televiziv.
Në këto regjistrime, këngëtari i ndjerë i pop-it flet hapur për ndjenjat e tij ndaj fëmijëve. Në një moment, Jackson dëgjohet duke thënë se, nëse nuk do t’i lejohej të ishte pranë fëmijëve, ai do i jepte fund jetës .
“Nëse do të më thoshit tani… Michael, nuk mund të shohësh më kurrë asnjë fëmijë… do vrisja veten,” dëgjohet të thotë ai në audio.
Në një tjetër deklaratë, Jackson shprehet: “Fëmijët përfundojnë duke rënë në dashuri me personalitetin tim. Ndonjëherë kjo më fut në telashe.”
Regjistrimet hedhin gjithashtu dritë të re mbi marrëdhënien e afërt që Jackson kishte me Gavin Arvizo, i cili më vonë e akuzoi atë për abuzim seksual gjatë gjyqit penal të vitit 2005. Jackson u shpall i pafajshëm për të gjitha 14 akuzat në atë çështje.
Dokumentari përfshin edhe pamje të papublikuara më parë, ku Jackson – i cili kishte pranuar se ndante shtratin me fëmijë – shihet duke kaluar kohë vetëm me Arvizon në ambientet e fermës së tij, Neverland.
Produksioni britanik Wonderhood Studios ka siguruar këto regjistrime për një seri dokumentar me katër pjesë të titulluar “The Trial”, e cila do të transmetohet javën e ardhshme në Channel 4. Seria fokusohet në ngjarjet që çuan drejt gjyqit të famshëm të Jackson në vitin 2005.
Një burim që ka dëgjuar regjistrimet u shpreh:
“Ka diçka jashtëzakonisht të pazakontë dhe shqetësuese në fiksimin e Michael Jackson ndaj fëmijëve, veçanërisht atyre që nuk ishin të tij.”
“Të dëgjosh zërin e tij duke folur për fëmijët në këtë mënyrë, duke pasur parasysh akuzat për abuzim, ngre shumë pikëpyetje mbi gjendjen e tij mendore, mënyrën e të menduarit dhe, fatkeqësisht, edhe qëllimet e tij.”
