Për kryetarin e PD, Sali Berisha, ministrja Belinda Balluku duhej të ishte arrestuar me kohë, pasi po prishin provat ditë e natë. Ndërkohë, sipas Berishës, Gjykata Kushtetuese është nën një presion të tmerrshëm.
Duke folur nga foltorja e Kuvendit në punimet e kësaj të enjteje, Berisha tha se Balluku ka administruar 12 miliardë euro, nga të cilat 10.3 miliardë janë zhdukur, ndërsa arrestimi do të ishte gjëja më e mirë që mund të ndodhte.
‘Ja ku e keni rrugën e Qafë Plloçës, ja ku i keni veprat. Shikoni rrugën e Ersekës. Shikoni rrugën e Arbrit’, theksoi Berisha.
Dhe përballë këtyre skandaleve, këtyre vjedhjeve të paimagjinueshme, përballë shkatërrimit të madh të materies kombëtare, rrënimit të vërtetë të ekonomisë... besoj e morët vesh që u kthyem ku ishim.
Për herë të parë në 32 vite, ekonomia mbahet nga kontributi i shtetit, jo nga ekonomia.
Ekonomia kontribuon vetëm 49 përqind të rritjes ekonomike. Sepse është në rënie të lirë.
Sepse droga dhe vjedhja po e shkatërrojnë atë.
Dhe tani, forca e ekzekutivit kundër pezullimit në një kohë kur ajo duhet të ishte prej kohësh e arrestuar sepse po prishin provat ditë e natë.
Sepse po zhdukin dokumentet ditë e natë.
Po, po.
Ka administruar 12 miliardë euro, nga të cilat absolutisht 10.3 miliardë janë zhdukur pa gjurmë, pa nam e nishan.
Ja ku e keni rrugën e Qafë Plloçës, ja ku i keni veprat.
Shikoni rrugën e Ersekës.
Shikoni rrugën e Arbrit.
Pra, para të gjitha këtyre, Gjykata Kushtetuese në një diktat të plotë dhe në presion të tmerrshëm, në vend që të hedhë poshtë shqyrtimin, siç hodhi poshtë shqyrtimin e 30 deputetëve, nuk e legjitimoi duke shkelur Kushtetutën, nuk hedh poshtë shqyrtimin e një mase të ligjshme që është e zakonshme në Europë dhe kudo.
