Në vijim të podcastit “Flasim” për çështjen e pezullimit nga detyra të zvkryeministres dhe njëkohësisht ministre e Infrastrukturës dhe Energjisë, Belinda Balluku, kryeministri Edi Rama u mbështet në qëndrimet e Komisionit të Venecias dhe Gjykatës Europiane të Strasburgut.
Në fjalën e tij, ai thekson se gjyqësori nuk ka kompetencë të ndërhyjë në përbërjen e ekzekutivit. Sipas tij, një ndërhyrje e tillë përbën shkelje të balancës së pushteteve, cenim të vullnetit demokratik dhe një rrezik serioz institucional, të paprecedent jo vetëm në Europë, por kudo.
Gjyqësori NUK duhet të pezullojë ministra.
Në standardet europiane, ku nuk besoj se ka mbetur ndonjë standard për ta shpikur Shqipëria—kjo është:
-joproporcionale në thelb
-antidemokratike në frymë
-antikushtetuese në përmbajtje
-nënshtrim i ekzekutivit
-kërcënim i paprekshmërisë së vullnetit demokratik
-kundër ndarjes së pushteteve
-kundër standardeve të Venecias
-kundër jurisprudencës së Gjykatës Europiane të Strasburgut
E pra, përfundimisht, pezullimi i një ministri është në vetvete absurd si koncept, sepse të pezullosh një ministër nuk do të thotë të pezullosh thjesht një individ -një funksionar publik të cilitdo nivel – por do të thotë të pezullosh një autoritet me fuqi ekskluzive vendimmarrëse në një a më shumë sektorë dhe kësisoj t’i pamundësosh ministrisë përkatëse të përfaqësohet në Këshillin e Ministrave e t’i propozojë qeverisë vendimet e përjavshme për ecurinë e sektorit. Kjo është një nonsens absolut.
Prandaj ministri ose rri në detyrë, ose largohet nga detyra me dorëheqje, nga Kryeministri, apo in extremis me dënim të formës së prerë sipas ligjit.
Tjetër nuk ka. Prokuroritë e Gjykatat nuk hyjnë fare në këtë mes dhe nuk e bëjnë kurrësesi këtë. Asnjëherë. Askund në Europë.
E nëse Shqipëria do të hynte në analet e historisë së drejtësisë europiane me një shpikje të tillë, kjo do të ishte, largqoftë, një shfaqje ulëritëse papjekurie demokratike dhe institucionale.
Uroj që Gjykata Kushtetuese t’ia kursejë këtë shfaqje Shqipërisë”, tha kryeministri Edi Rama.
