Policia e Tiranës finalizoi operacionin “Improvizimi”, duke zbuluar një ambient në zonën malore të fshatit Mukje, të përshtatur për tharjen e bimëve narkotike dhe përgatitjen për shitje.
Gjatë operacionit u arrestua J. M., 42 vjeç, i cili dyshohet si organizatori i veprimtarisë kriminale. Po ashtu, për moskallëzim të krimit, është vënë në hetim B. M., 59 vjeç, i cili dyshohet se kishte dijeni për aktivitetin dhe nuk e kishte denoncuar.
Nga ambienti u sekuestruan 516 gramë lëndë narkotike Cannabis Sativa.
NJOFTIMI I POLICISË
Tiranë/Finalizohet operacioni policor antidrogë, i koduar “Improvizimi”.
Zbulohet një ambient në zonën malore të fshatit Mukje, i përshtatur për tharjen e bimëve narkotike dhe përgatitjen e tyre për shitje.
Arrestohet organizatori i kësaj veprimtarie kriminale.
Vihet në hetim, për moskallëzim të këtij krimi, një shtetas.
Sekuestrohet nga ky ambient, një sasi Cannabisi.
Në vijim të operacioneve të Policisë së qarkut Tiranë, për goditjen e veprimtarive kriminale në fushën e narkotikëve, si dhe si rezultat i ndjekjes dhe hetimit të indicieve të marra në rrugë operative, specialistët e Seksionit për Hetimin e Narkotikëve finalizuan operacionin “Improvizimi”.
Gjatë operacionit u arrestua shtetasi J. M., 42 vjeç dhe nisi procedimi penal për shtetasin B. M., 59 vjeç.
42-vjeçari dyshohet se kishte improvizuar një ambient në territorin malor të fshatit Mukje, të cilin e kishte përshtatur për tharjen e bimëve narkotike dhe përgatitjen e tyre për shitje, ndërsa shtetasi B. M. dyshohet se kishte dijeni për këtë veprimtari dhe nuk e kishte kallëzuar.
Gjatë kontrollit, nga ky ambient u sekuestruan 516 gramë lëndë e dyshuar narkotike Cannabis Sativa.
Materialet procedurale iu referuan Prokurorisë së Tiranës, për veprime të mëtejshme.
