Liam Hemsworth dhe e dashura e tij prej kohësh, Gabriella Brooks, kanë ngritur dyshime për një fejesë të mundshme.
Brooks, 29 vjeçe, u fotografua fundjavën e kaluar duke ecur në Ibiza të Spanjës. Por ajo që tërhoqi vëmendjen më shumë ishte unaza në dorën e majtë.
Në të njëjtin udhëtim ishte edhe aktori 35-vjeçar i “Hunger Games”, ndërsa qëndronin në një jaht së bashku me familjen dhe miq të afërt.
Fotot janë publikuar nga mediat ndërkombëtare dhe kanë ndezur spekulimet në rrjetet sociale se çifti mund të jetë fejuar, megjithëse as Hemsworth dhe as Brooks nuk kanë reaguar ende publikisht.
Ndërkohë, Liam ndau në Instagram disa foto nga pushimet , duke uruar vëllain e tij, aktorin Chris Hemsworth, për ditëlindjen e 42-të. “Gëzuar ditëlindjen vëlla Chris! Faleminderit që je gjithmonë një legjendë. Mos ndrysho kurrë. Shpresoj të kem barkun tënd një ditë. Të dua,” shkroi ai krahas një fotoje me vëllezërit Chris dhe Luke Hemsworth.
Liam dhe Gabriella janë parë për herë të parë bashkë në dhjetor të vitit 2019 në Byron Bay, Australi, disa muaj pas ndarjes së aktorit nga ish-bashkëshortja e tij, Miley Cyrus. Ata debutuan në tapetin e kuq si çift në nëntor 2022, pas thashethemeve për ndarje më herët atë vit.
Para lidhjes me Liam, Gabriella ka qenë në një marrëdhënie katërvjeçare me këngëtarin Matty Healy nga grupi “The 1975”.
