Pas disa ditësh paqartësi në koalicionin "Nisma Shqipëria Bëhet" për mandatin e vetëm të deputetit, sherri u bë më në fund publik.
Me termin e preferuar të Ramës, "kënetë", Adriatik Lapaj sulmoi në një status në Facebook Endri Shabanin, duke e bërë përgjegjës për bllokimin e mandatit të vetëm që mori ky koalicion, nga një i afërm i Shabanit, Zeqir Kordhoni.
"Është angazhuar gjithë këneta si e si të mos shkoj unë në Kuvend. Po sa tmerr më keni?! O të mjerë, unë nuk pranoj shantazh e as shitem.
Zeqiri (dajo i Endrit) dhe nipi i tij Endri Shabani të cilit i shtriva dorën e bashkimit nuk do marrin asnjë mandat. Qameti do ndalojnë mua të shkoj në Parlament.
Është një popull i tërë dëshmitar se Endri Shabani u angazhua për hapjen e listave dhe doli garant për familjarët e vetë.
Nëse Endri Shabani do të mbahet mend kështu në jetën publike, mbarë u shkoftë bashkë me dajon!
Jam krenar që u luftova nga çdo anë dhe nuk u ndala! U luftova nga Rama, Saliu dhe këta "të rinjtë", deri dhe te ky që e futa në gji...nga të gjithë.
Ndaj meje dhe krejt ekipit të Lëvizjes Shqipëria Bëhet po konsumohet publikisht PADREJTËSI!
Populli do gjykojë." - shkruan Lapaj.
