Mbeten ende mister rrethanat e rrëmbimit dhe vrasjes së Renis Dobrës mbrëmjen e 8 korrikut në Mat, trupi i të cilit u gjet pranë liqenit të Shkopetit, ndërsa makina brenda në ujë.
Dyshohet se 23-vjeçari është dhunuar dhe goditur me qytën e armës, përpara se të mbytej me litar nga autorët.
Më pas, automjeti i Renis Dobrës është hedhur drejt humnerës në Liqenin e Shkopetit, ndërsa në rrethana ende të paqarta trupi i viktimës ka dalë nga makina pak metra para se mjeti të përfundonte në ujë.
23-vjeçari po shkonte drejt shtëpisë me një automjet tip Benz ngjyrë jeshile në pronësi të babait të tij, kur autorët që e ndiqnin me fuoristradë e kanë ndaluar rreth 970 metra larg banesës në fshatin Zenisht.
Personat që dyshohet të kenë qenë me veshje policie, e kanë ndaluar dhe e kanë detyruar të zbresë nga makina, ndërsa në ato minuta kushëriri i Renis Dobrës ka mbërritur nga Burreli për të shkuar në shtëpi, duke u përballur me autorët të cilët i kanë thënë “ec, se jemi policia”.
Një kamera sigurie ka fiksuar momentin e ndjekjes së Renis Dobrës nga autorët, që dyshohet të kenë qenë më shumë se 3 dhe më pas kthimin drejt Burrelit të Fuoristradës, si edhe makinës ku ndodhej viktima.
Skena ka zgjatur 1 minutë e 20 sekonda dhe Renis Dobra dyshohet të jetë nxjerrë dhunshëm nga automjeti i tij, raporton emisioni “Uniko”.
Babai i 23-vjeçarit, Rifat Dobra, ka rrëfyer telefonatën e fundit me të birin dhe gjetjen e trupit. Ai ka deklaruar se pasi nipi i tij e njoftoi se Renisi ishte ndaluar nga policia shkuan drejt Komisariatit, ku edhe pasi zbuloi se i biri nuk ndodhej atje, i nisën dyshimet për përfshirje të mafias.
Rifat Dobra u shpreh se autorët kishin kaluar para Komisariatit të Burrelit 4-5 minuta para tij, duke u shprehur se kanë lëvizur lirshëm dhe pa problem. (VIDEO KETU)
Babai i viktimës: Renisi është djalë i vetëm, kam edhe 3 goca. Më mori në telefon në orën 21:40 nga Burreli më tha ‘babai po nisem për shtëpi’. Mirë, i thashë hajde. Më tha ‘A të ndalem tek halla?”, i thashë që ‘Jo, nuk janë aty sonte, janë në një darkë’. E ka hallën këtu afër. Erdhi ora 22:04 më mori nipi në telefon e më tha ‘Dajë ku je?’, i thashë ‘në shtëpi’. Mu drejtua ‘Shpejt hajde sipër se ka kapur Renin policia’. Shkova, i dola nipit para dhe ikëm në polici. Nipi më tha që ‘dajë u ndala, kam pasur nusen dhe 3 fëmijët në makinë, bëra të ndalem, por më thanë ik shpejt se jemi policia’. Nipi është trembur, se kishte menduar policia. Në atë moment më mori dhe më tha që policia ka kapur Renin. S’ka pasur probleme. Shkuam direkt për të pyetur se pse e ka kapur policia, rreth orës 22:15 min, shkova tek roja i thashë a është djali im këtu. “Jo çfarë çuni ka këtu”, i thashë di që më ka kapur policia në Zenisht. Më tha që s’ka ardhur makina jote këtu dhe merr 129 në telefon. Aty më nisën dyshimet se e ka marrë mafia, erdhi policia dhe hapën kamerat.
Deri në 4 të mëngjesit kemi qëndruar aty, të gjithë, asnjë lloj orientimi. Si hapën kamerat na thanë ka kaluar para degës së Komisariatit rreth orës 22:11. Unë kam mbërritur 4-5 min pas autorëve.
Policia na thanë kemi kërkuar, por s’e dimë. Pastaj dolëm vetë. Kemi qenë 2-3 makina kemi kërkuar, gjithë rrugës ec-ndalo me elektrik, shiko ndonjë ferrë a ndonjë shkëmb, pak pa rënë tek kthesa e Ulzës me drita të makinës pashë shapkën e çunit. Mora policinë dhe e njoftova, i thashë ejani se kemi gjetur shapkën e çunit, Erdhi ekspertiza, qëndruam aty, ne vazhduam prapë, policia qëndroi aty. Më pas erdhi dhe policia tek lokali që është matanë urës së Ulzës, rrugës që shkon për Milot. Policia ndaloi duke verifikuar kamerat tek lokali, ne u nisëm prap në këmbë buzë rrugës, duke parë shkëmbinjtë. E dërguam nipin të na marrë cigare, sepse po na ikte truri. Duke u kthyer nga Shkopeti kishte parë vaj në liqen, erdhi nipi tha ‘dajë kam parë tek liqeni vaj’, makina nuk dukej. Shkuam tek vendi, pashë copat e makinës sime, zbriti një shok i imi dhe nipi, ata e kishin parë çunin, e kishte mbajtur një… Renisi s’ka probleme, si çunat e rinj ndonjë gjë të vogël, por jo deri në këtë pikë.
Kërkoj drejtësi, të gjendet autorët. Prova, fakte, ka sa të duan, mund ta zbardhin patjetër. Ka shumë kamera, edhe shoferin mund ta identifikojë, ka hyrë në qytetin e Burrelit, para komisariatit, pa pikë problemi. Të dalë e vërteta. Djali më tregonte çdo gjë, ishim si shokë.
