Në të njëjtën ditë, Shqipëria është shfaqur me dy fytyra krejt të kundërta në kontakt me Gjermaninë, njëra e guximshme deri në delir për t’i mbajë leksione Europës, tjetra me akuza të rënda politike, ku gjendja në vend ngjan me shtetet peng të karteleve të drogës në Amerikën Latine.
Në Bavari, në zemër të Gjermanisë kulturore, Kryeministri Edi Rama mbajti një fjalim të ngarkuar me metafora për endrrën e një Europe të bashkuar në ceremoninë hapëse të Herrenchiemsee Festspiele, një festival prestigjioz i muzikës klasike që zhvillohet çdo verë në ishullin Herreninsel të liqenit Chiemsee. I krijuar në vitin 2000 si një homazh për Bach-un, festivali është shndërruar në një stacion të rëndësishëm të kalendarit europian të muzikës.
Përpara një audience të përzgjedhur, Rama shpalosi një mesazh filozofik mbi sfidat e kontinentit kur tha se: “Bavaria na kujton se fuqia ekonomike dhe thellësia kulturore nuk janë të kundërta — janë binjake; se begatia pa poezi është e zbrazët; se pushteti pa kujtesë është i verbër; se Europa pa shpirt nuk është më Europë.”
Duke mos i shpëtuar dot sindromës së liderit global, Rama theksoi nevojën për të mbrojtur jo vetëm kufijtë fizikë të kontinentit, por edhe esencën shpirtërore të tij. Fjalimi ishte edhe një ofertë për të ruajtur identitetin europian përballë krizës së kohës.
Ndërkohë, në Tiranë, larg skenës baroke të Herreninsel-it, dy deputetë të Bundestagut zhvilluan një takim me liderin e opozitës, Sali Berisha, dhe përfaqësues të Partisë Demokratike. Vizita e tyre ishte pjesë e një misioni faktmbledhës të Komisionit për Çështjet e BE-së në Bundestag, lidhur me procesin e zgjerimit të Bashkimit Europian në Ballkanin Perëndimor.
Tilman Kuban, zëdhënës për çështjet evropiane i grupit CDU/CSU, dhe Dr. David Preisendanz, anëtar i të njëjtit komision, u informuan nga opozita mbi atë që Berisha e cilësoi si “farsën elektorale të 11 majit”, duke akuzuar qeverinë për përdorim të strukturave shtetërore në shërbim të pushtetit.
“Dy deputetëve të nderuar gjermanë u përshkrova modelin autoritar të regjimit, dhe se si Edi Rama ka ndërtuar të parin dhe te vetmin narkoshtet në Europë, që prej ardhjes së tij në pushtet në vitin 2013. Kartelet shqiptare kanë arritur tanimë të kthehen, falë tij, në organizatat kryesore të kontrollit të trafiqeve nga Amerika Latine dhe Lindja, e deri në portet kryesore të Europës. Një realitet i kriminalizuar dhe i korruptuar është në bazë të eksodit masiv të shqiptarëve, që varfërohen dita ditës që të forcohet narko-shteti i Ramës” shkruajti Berisha në rrjetet sociale.
Në thelb, të dyja takimet nuk kanë sjellë asgjë të re për sytë dhe veshët e ndërkombëtarëve, që tashmë prej vitesh këshillojnë zbutjen e toneve politike në vend, gjithsesi duke e parë përplasjen politike në vendin tonë si një nga më ekzotiket në rajon.
