Nicolas Cage ka reflektuar me humor mbi arsyen pse lidhja e tij me Sarah Jessica Parker nuk zgjati shumë. Në një deklaratë për E! News të hënën, më 14 korrik, Cage, 61 vjeç, tha se takimi i tij i parë me nënën e aktores nuk shkoi siç duhej.
“Më pëlqente Sarah, por nuk besoj se e kalova testin e nënës,” u shpreh ai. “Më kujtohet që darkuam bashkë me të dhe nënën e saj në Russian Tea Room, dhe nuk e di nëse ishte xhaketa ime blu por nuk mora më përgjigje nga ajo.”
Deklarata vjen pasi Sarah Jessica Parker konfirmoi në emisionin “Watch What Happens Live with Andy Cohen” më 13 korrik se kishte pasur një romancë me aktorin e filmit National Treasure, gjatë kohës që xhironin komedinë romantike “Honeymoon in Vegas” në vitin 1992 — një film ku shfaqet edhe Bruno Mars si fëmijë, duke imituar Elvis Presley.
“A ke dalë me Nicolas Cage?” – e pyeti drejtëpërdrejt moderatori Andy Cohen. “Po, kam dalë,” u përgjigj Parker me një buzëqeshje.
Nicolas Cage është martuar pesë herë, dhe që nga viti 2021 është i martuar me Riko Shibata, me të cilën ka një vajzë të quajtur August Francesca. Ai gjithashtu ka dy djem nga lidhje të mëparshme: Weston Cage Coppola, 34 vjeç, dhe Kal-El, 19 vjeç.
Nga ana tjetër, Sarah Jessica Parker është e martuar me aktorin Matthew Broderick që nga viti 1997. Ata janë njohur në vitin 1992 dhe kanë tre fëmijë së bashku.
Në të njëjtin emision, Parker foli për momentin kur e kuptoi se Broderick ishte personi i duhur për të:
“Thjesht e dija që ishte i jashtëzakonshëm,” tha ajo, duke shtuar se ishte ajo që e tha e para “Të dua” në marrëdhënien e tyre.
