Kanye West ka shkaktuar pakënaqësi të madhe mes fansave pas një shfaqjeje në Shangai të dielën, ku shumë prej tyre kërkuan rimbursim për koncertin e dështuar.
Sipas raporteve të disa fansave, reperi ka mbërritur më shumë se 45 minuta vonë dhe ka ofruar një performancë që shumë e cilësuan si zhgënjyese.
Një prej përdoruesve në platformën X (ish-Twitter) ka shpërndarë një video nga koncerti, duke shkruar: “Kam qenë fans i Kanye West që nga rinia ime, por ky ishte koncerti më i keq që kam parë. Paguam 260 dollarë për të parë një shfaqje, por ai ishte kryesisht duke kënduar playback.”
Sipas tij, Kanye shpesh ikte nga skena, duke lënë muzikën të luante ndërkohë që ai ishte zhdukur për më shumë se 20 minuta. Po ashtu, reperi mbante maskë gjatë gjithë shfaqjes.
Disa fansa kanë shpërndarë gjithashtu video ku duket që turma në Shangai po kërkon rimbursim për shfaqjen, duke shprehur revoltën e tyre për një përvojë që nuk i plotësoi pritshmëritë.
Megjithatë, Kanye nuk ka komentuar ende për këtë incident, por ka falënderuar fansat e tij në Kinë për mbështetjen, duke thënë se mezi po pret të rikthehet në skenë për shfaqje të tjera.
