Sarah Jessica Parker është shprehur hapur për pjesën më të vështirë të karrierës së saj në serialin legjendar “Sex and the City”, gjatë një interviste të fundit në podcast-in Call Her Daddy.
“Gjëja më e vështirë ishte kur flisnin për trupin dhe pamjen time fizike,” u shpreh aktorja 60-vjeçare.
“Ishin komente për gjëra që nuk mund t’i ndryshoja, nuk doja t’i ndryshoja dhe kurrë nuk e kisha menduar ta bëja. Edhe pas gjithë atyre fjalëve, sërish nuk kam interes t’i ndryshoj.”
Aktorja e “Sex and the City” kujton se gjatë viteve 1998–2004, në kulmin e suksesit të saj, nuk ishte e përgatitur për kritikat e ashpra dhe mizore që merrte rreth pamjes së saj.
“Lexova një koment shumë të keq në një revistë. Fillova të qaj dhe telefonova dy miq të mi meshkuj. Ishte hera e vetme kur qava vërtet nga gjithë kjo,”tregoi ajo.
Parker tha se shpesh pyeste veten:
“Po sikur dikush të më thoshte në sy: ‘Je e shëmtuar’? Do të thosha: ‘E para, është e vështirë ta dëgjosh këtë. Por e dyta, pse je kaq i zemëruar? Pse e ndjen të nevojshme të komentosh për këtë gjë?’”
Ajo shtoi se para serialit nuk kishte pasur kurrë thashetheme për jetën apo pamjen e saj – ishte vlerësuar vetëm për punën. “Isha mësuar të më gjykonin si aktore, jo si grua apo si trup.”
