Taylor Swift është përfshirë sërish në përplasjen ligjore mes Justin Baldoni dhe Blake Lively lidhur me filmin “It Ends With Us”, pasi një gjykatës federal hodhi poshtë kërkesën për ta thirrur atë si dëshmitare në gjyq.
Sipas dokumenteve të siguruara nga Page Six, Gjykatësi i Distriktit të SHBA-së, Lewis Liman, vendosi të mërkurën që aktori i “Jane the Virgin” ka të drejtë të kërkojë komunikimet mes Swift dhe Lively në lidhje me filmin e vitit 2024 që trajton dhunën në familje.
“Kërkesat për mesazhet me Swift lidhur me filmin dhe këtë çështje janë të përshtatura në mënyrë të arsyeshme për të zbuluar informacione që do të vërtetonin ose përgënjeshtronin pretendimet e Lively për ngacmim dhe hakmarrje”, tha gjykatësi Liman.
Ndërkohë, ekipi ligjor i Lively kishte kërkuar që të mbroheshin mesazhet e saj me këngëtaren e njohur, duke argumentuar se ato nuk janë të rëndësishme për çështjen.
Kujtojmë që aktorja e “Gossip Girl” paditi Baldonin në dhjetor për ngacmim seksual dhe për orkestrimin e një fushate për të dëmtuar reputacionin e saj.
Nga ana tjetër, avokatët e Baldonit kanë refuzuar një marrëveshje që do të shmangte përfshirjen e mesazheve të Swift, në këmbim të videove dhe komunikimeve të plota të prodhimit të filmit.
Në dokumentet gjyqësore thuhet se aktori ka akuzuar Blake se ka përdorur ndikimin e Taylor Swift dhe bashkëshortit të saj Ryan Reynolds për të marrë kontroll mbi projektin filmik. Madje, ai pretendon se është ftuar në shtëpinë e çiftit për të diskutuar ndryshime në skenar, ku ishte e pranishme edhe Swift.
Avokati i Baldonit, Bryan Freedman, ka përmendur ekzistencën e mesazheve ku Lively i referohej Swift dhe Reynolds si “dragonjtë” e saj – duke lënë të kuptohet se ishin njerëzit që do ta mbronin dhe do ta ndihmonin të përballej me produksionin.
Swift ishte zyrtarisht thirrur me fletëthirrje në maj për të dëshmuar në gjyqin që pritet të zhvillohet në mars 2026, por më vonë kërkesa u tërhoq.
Megjithatë, burime për Page Six thonë se këngëtarja është "thellësisht e mërzitur" me Lively për përfshirjen e saj në këtë çështje ligjore dhe se marrëdhënia e tyre është në krizë.
