R. Kelly, i cili po vuan një dënim prej 30 vitesh burg për trafik seksual dhe shfrytëzim të të miturve, është shtruar në spital pas një mbidoze të rëndë në burg.
Sipas një padie të dorëzuar nga avokatët e tij dhe siguruar nga Fox News Digital, ngjarja ndodhi mëngjesin e 13 qershorit: “Z. Kelly u zgjua duke u ndier i lodhur, me marramendje dhe me njolla të zeza në shikim. U rrëzua në tokë dhe u përplas drejt derës së qelisë përpara se të humbiste ndjenjat.”
Ai u transportua me urgjencë në spital dhe qëndroi dy ditë i shtruar, ku mjekët konfirmuan se kishte marrë një dozë të tepërt të medikamenteve që përdor rregullisht për ankthin dhe gjumin.
Avokatët e këngëtarit pretendojnë se mbidoza nuk ishte aksidentale, por ndodhi vetëm dy ditë pasi Kelly kërkoi leje të përkohshme për të dalë nga burgu.
“Ekipi i Byrosë së Burgjeve i dha një dozë të rrezikshme që vuri në rrezik jetën e tij,” thuhet në dosjen gjyqësore. Ata shkojnë edhe më tej, duke akuzuar zyrtarët federalë për një komplot për ta vrarë: “Ai i kishte denoncuar më parë publikisht për një skemë për ta eliminuar për të fshehur krimet e tyre.”
Sipas dokumenteve, R. Kelly është ankuar prej muajsh për një këmbë të enjtur, problem i rrezikshëm për shkak të historikut me mpiksje gjaku. Megjithatë, ai është lënë pa trajtim të duhur dhe, sipas avokatëve, së fundmi i është ndërprerë edhe terapia me hollues gjaku, duke rritur ndjeshëm rrezikun për jetën e tij.
Në një deklaratë tronditëse, avokatët thanë se Kelly i telefonoi ditën e ngjarjes: “Ishte me lot në sy, i frikësuar se do ta vrisnin ose do ta linin të vdiste.”
Pas shtrimit në spital në Duke University Hospital në Karolinën e Veriut, ai u largua me forcë nga spitali, pavarësisht kundërshtimeve të mjekëve.
Në një përgjigje për Fox News Digital, Byroja Federale e Burgjeve deklaroi: “Për arsye privatësie dhe sigurie, nuk mund të komentojmë mbi kushtet e ndalimit të asnjë individi, përfshirë çështjet shëndetësore.”
