Jessie J ka premtuar para fansave të saj se do ta “mposht” kancerin e gjirit gjatë performancës së saj të fundit live përpara fillimit të trajtimit mjekësor.
Këngëtarja zbuloi më herët këtë muaj se ishte diagnostikuar me kancer gjiri në fazë të hershme, pas një periudhe të gjatë testimesh mjekësore. Në një postim emocional në Instagram, ajo u shpreh se ishte e ndarë mes dëshirës për ta mbajtur të fshehtë dhe nevojës për ta ndarë me publikun.
“Dua ta ndaj me fansat dhe njerëzit që kujdesen për mua,” shkroi ajo. Jessie shtoi se kishte nevojë ta përpunonte vetë lajmin përpara se ta bënte publik.
Që nga shpallja e diagnozës, ajo ka qenë aktive në rrjetet sociale, duke ndarë me ndjekësit përditësime të sinqerta, përfshirë dhe një moment emocional javën e kaluar, të cilin e përshkroi si “ditën më të keqe deri tani”.
Në koncertin Capital’s Summertime Ball, që u mbajt në Wembley Arena të dielën, më 15 qershor, Jessie J iu drejtua turmës prej 75,000 personash duke thënë: “Ky është koncerti im i fundit para se të nis trajtimin për të mposhtur kancerin e gjirit.”
Publiku shpërtheu në brohoritje, ndërsa ajo vijoi emocionuar: “Është shumë e veçantë për mua, nuk e imagjinoni sa. Jam krenare që ndjehem mirë dhe që mund të jem ky personi i sinqertë që flet me zemër.”
Ajo përmendi me mirënjohje jetën e saj, djalin, partnerin, familjen dhe stafin, duke theksuar: “Jemi me fat. Kemi kaq shumë arsye për të jetuar, për të ndjerë gëzim, kaq shumë gjëra për të bërë.”
Gjatë koncertit, Jessie J interpretoi hite si “Do It Like a Dude”, “No Secrets” dhe “Living My Best Life”.
Në një postim të mëparshëm, ajo kishte theksuar rëndësinë e pranimit të ndjenjave si frika, zemërimi, trishtimi dhe paniku, duke shkruar: “ Nuk mund të shërohemi nëse nuk i pranojmë ato që ndjejmë.”
