Brad Pitt ka zbuluar se nuk është i gatshëm të rrezikojë jetën për t’u rikthyer në ekranin e madh krah Tom Cruise, më shumë se 30 vjet pas bashkëpunimit të tyre në filmin “Interview With the Vampire”.
Gjatë premierës së filmit të ri “F1” në Mexico City, aktori 61-vjeçar u shpreh për E! News: “Nuk kam ndërmend të varem jashtë avionëve e gjëra të tilla, kështu që do bëjmë diçka bashkë vetëm kur të jetë tokësore.” Pitt iu referua pasionit të njohur të Cruise për të realizuar vetë skenat e rrezikshme në filmat e tij, sidomos në serinë “Mission: Impossible”.
“Interview With the Vampire” mbetet i vetmi film ku Pitt dhe Cruise kanë luajtur së bashku deri tani. Në një prezantim në CinemaCon 2025, Tom foli me entuziazëm për “F1” dhe aftësitë e Brad si drejtues:
“E kam parë duke ngarë – është shumë i mirë. Më besoni, kam garuar me të.”
Regjisori Joe Kosinski, i cili ka punuar me Cruise në “Top Gun: Maverick” dhe me Pitt në “F1”, foli për diferencat mes dy aktorëve: “Tom gjithmonë i çon gjërat në kufijtë ekstrem, ndërsa Brad është më realist, e njeh kufirin e vet.”
Drejtuesi i aksioneve në “F1”, Graham Kelly, shtoi: “Me Tom-in do kishim pasur ndonjë përplasje. Ai i çon gjërat në skaj. Brad dëgjon, e di çfarë mund të bëjë dhe pranon kur diçka është përtej tij.”
Filmi “F1”, me aktorë si Damson Idris, Kerry Condon, Tobias Menzies dhe Javier Bardem, pritet të dalë në kinema më 27 qershor.
