Producenti dhe regjisori, Tyler Perry, është paditur për sulm seksual dhe ngacmim të vazhdueshëm nga aktori Derek Dixon, i cili ka luajtur në serialin e njohur “The Oval”.
Dixon ka ngritur një padi në Gjykatën e Lartë të Qarkut të Los Anxhelosit, ku kërkon 260 milionë dollarë për ngacmim në vendin e punës, sulm seksual dhe dhunë fizike.
Sipas padisë, ngjarja e parë ka ndodhur në janar të vitit 2020, kur Perry e ftoi Dixon në shtëpinë e tij në Atlanta. Aktori tregoi se kishte konsumuar alkool dhe fjeti në një nga dhomat e miqve, ku më pas Perry është futur në shtrat me të dhe ka tentuar ta prekë në mënyrë të papërshtatshme.
Dixon gjithashtu pretendon se gjatë viteve të bashkëpunimit në serial, ai i ka dërguar vazhdimisht mesazhe me përmbajtje seksuale, por nuk ka raportuar ngacmimet nga frika se do të humbiste rolin në serial.
Në reagim ndaj padisë, avokati i Tyler-t, Matthew Boyd, e ka quajtur atë një “përpjekje për shantazh” dhe pretendimet si “të fabrikuara”.
“Ky është një individ që iu afrua Tyler Perry-t me një histori që tani duket të jetë një mashtrim i mirëfilltë. Tyler nuk do të dorëzohet dhe jemi të bindur se këto pretendime të sajuara do të rrëzohen në gjykatë,” tha Boyd.
