Qetësohen trazirat në burgun Marassi të Genova. Dy oficerë policie janë plagosur dhe janë dërguar në spital. Dy të tjerë kanë marrë trajtim në vend. Disa qeli janë shkatërruar. “Corriere della Sera” shkruan se protesta nisi prej disa të burgosurve, por më pas u hapën edhe qelitë e tjera, duke shkaktuar kaos.
Disa të burgosur u ngjitën në çati dhe në shtegun e mureve përreth, por nuk mundën të kalonin më tej. Policia dhe karabinierët qëndronin jashtë, gati për të ndërhyrë në rast se situata do të degradonte.
Kaos brenda strukturës, por tension edhe jashtë, në lagjen ku ndodhet burgu pasi çdo lëvizje u bllokua. 100 oficerë u desh të ndërhynin për të shuar trazirat në burg që përfshinin rreth 200 të burgosur. Gjatë trazirave, stafi mjekësor i burgut u vendos në dhoma të sigurta jashtë mundësisë që të burgosurit t’i arrinin.
Trazirat shpërthyen kur një grup të burgosurish u rebeluan kundër oficerëve, duke shkaktuar kaos dhe duke marrë nën kontroll një seksion. Sipas disa thashethemeve, pati edhe një përpjekje për arratisje. Disa të burgosur u ngjitën në çatinë e njërës prej ndërtesave të burgut, të kontrolluara nga policia e burgut.
Ndër hipotezat rreth trazirave, ajo e një larjeje hesapesh midis të burgosurve pas një sulmi që ndodhi ditët e fundit. “Duket se 6 të burgosur gjatë ditëve të fundit kanë përdhunuar një të burgosur tjetër, i cili mbrëmë u dërgua në spitalin e qytetit për trajtim. ©LAPSI.al
