Faqja prestigjioze e çiklizmit Cycling News raporton se “Giro d’Italia” nis këtë të premte në Shqipëri me etapën e parë nga tre që do të zhvillohen në territorin shqiptar, por përgatitjet janë shoqëruar me kaos në rrugë, trafik të rënduar dhe punime të papërfunduara.
Drejtori sportiv i ekipit Alpecin-Deceuninck, Gianni Meersman, u shpreh se ekipi i tij u detyrua të eksploronte itinerarin me makinë pasi pedalimi nëpër Tiranë rezultoi “jashtëzakonisht i rrezikshëm”.
“E eksploruam me makinë,” tha Meersman. “Gjatë rrugës po diskutonim nëse duhej ta provonim me çiklistë.
Pastaj pamë Astanën në mes të trafikut dhe vendosëm menjëherë që nuk do ta bënim.” Tirana u përshkrua si një rrëmujë e vërtetë edhe nga çiklisti i njohur belg Wout van Aert i skuadrës Visma, i cili e cilësoi eksperiencën dhe rrugët si “të paparashikueshme”.
“Nuk është dramatike kudo, por është e paparashikueshme se ku do të shfaqen gropat. Nuk është kritikë, por është ndryshe nga ajo me të cilën jemi mësuar,” tha Van Aert.
Një tjetër raportim nga faqja daneze Feltet.dk tregon se shtrimi i asfaltit të freskët dhe riparimet kanë vazhduar deri në ditët e fundit para garës, me punëtorë që vraponin për të mbyllur vrimat në rrugë deri të enjten.
“Nuk kam parë kurrë kaq shumë punëtorë asfalti në një rrugë shqiptare,” tha çiklisti danez Bjarke Vodder Nielsen, rezident në Shqipëri, pasi përshkoi fazën e parë të garës një ditë para nisjes.
Pra në vend të krenarisë për mikpritjen, Shqipëria po përballet me një test infrastrukture. Ndoshta 7 milion eurot që janë paguar për aktivitetin ciklistik, do të kishte qenë më mirë të shpenzoheshin për mirëmbajtjen e rrugëve./Cycling News
