Gjykata e Posaçme Kundër Korrupsionit dhe Krimit të Organizuar (GJKKO) ka lëshuar 6 urdhër-kontrolle ndaj anëtarëve të shtabeve elektorale të Partisë Socialdemokrate (PSD) në qytetin e Shkodrës.
Burime për gazetaren Klodiana Lala bëjnë me dije se një prej të personave ka refuzuar bashkëpunimin me autoritetet dhe si pasojë është shoqëruar nga policia për të vijuar procedurat e mëtejshme.
Ndërkohë gjatë operacionit janë sekuestruar disa celularë dhe është kryer kontroll i automjeteve të disa prej personave të përfshirë.
Hetimet vijnë në kuadër të dyshimeve për veprimtari të paligjshme të lidhura me procesin zgjedhor, vetëm pak ditë përpara votimeve të 11 majit.
Ndërkohë sot në qytetin e Shkodrës ishte kreu i SPAK, Altin Dumani, i cili ka zhvilluar një mbledhje me kreun e Prokurorisë së Shkodrës, kreun e policisë vendore dhe me përfaqësues të institucioneve ligjzbatuese.
Gjatë takimit, lreu i SPAK ka vënë theksin tek zbulimi i krimeve zgjedhore. Po ashtu, Dumani kërkoi që policia dhe prokuroria të jenë sa më vigjilente lidhur me krimet zgjedhore.
