Interpol Tirana ka finalizuar me sukses ekstradimin e dy shtetasve të kërkuar ndërkombëtarisht, njëri drejt Turqisë dhe tjetri drejt Greqisë, pas koordinimit të veprimeve me Interpol Ankaranë dhe Interpol Athinën.
Ekstradimi në Turqi – Burak Kara, 39 vjeç, i lindur në Turqi, u ekstradua pasi ishte dënuar nga Gjykata e Mersinit në vitin 2022 me 8 vjet e 4 muaj burg, për marrëdhënie seksuale me dhunë ndaj një shtetaseje turke në vitin 2011. Ngjarja ndodhi në një banesë në Mersin, ndërsa i dënuari ndodhej në gjendje të dehur. Ai kishte edhe rreth 4 vjet e gjysmë burg të pashlyer.
Ekstradimi në Greqi – Shtetasi I. A., 59 vjeç, i lindur në Bullgari, u ekstradua në Greqi ku akuzohet për ndërmjetësim për birësim të paligjshëm. Ai dyshohet se në bashkëpunim me të tjerë, rekrutonte gra shtatzëna në kushte të vështira ekonomike, të cilat i dërgonte në Greqi për të lindur dhe më pas ndërmjetësonte shitjen e foshnjave për 2000 deri në 4000 euro për rast. Ai u arrestua nga Policia Kufitare në Korçë.
