Kryesocialisti Edi Rama zhvilloi këtë të enjte një takim me përfaqësues të biznesit në qytetin e Elbasanit, ku prezantoi iniciativën e re të qeverisë, të quajtur “Paqja Fiskale”. Sipas shefit të qeverisë, kjo paketë synon të krijojë një qasje të re në marrëdhënien mes administratës tatimore dhe sektorit privat, duke ofruar zgjidhje për detyrimet e prapambetura.
“Qëllimi nuk është rritja e të ardhurave përmes presionit mbi sipërmarrjen, por ndërtimi i një marrëdhënieje të re, të bazuar te mirëkuptimi dhe dialogu,” u shpreh Rama, duke theksuar se niveli i tatim-fitimit për bizneset mbetet në kuotën 15%, pa ndryshime të parashikuara.
Sipas Kryeministrit, administrata tatimore ka ende boshllëqe dhe probleme të trashëguara që kërkojnë një qasje të re, duke lënë pas mënyrat tradicionale të kontrollit dhe penalizimit.
Në vijim, Ministrja e Shtetit për Sipërmarrjen dhe Klimën e Biznesit, Delina Ibrahimaj, bëri publike tre shtyllat kryesore mbi të cilat bazohet “Paqja Fiskale”:
Tatimi i dakordësuar: Bizneset do të mund të lidhen me administratën tatimore për një periudhë trevjeçare, në bazë të së cilës do të përllogaritet një normë fikse tatimi mbi fitimin, në masën 15%. Fitimi shtesë mbi këtë nivel do të tatohet me 5%, ndërsa subjektet pjesëmarrëse do të përjashtohen nga kontrollet tatimore gjatë kësaj kohe.
Rishikimi i bilanceve: Sipërmarrjet do të kenë të drejtën të rishikojnë pasqyrat financiare për pesë vitet e fundit. Për çdo diferencë të deklaruar, do të aplikohet një normë tatimore e reduktuar prej 5%, duke garantuar kështu mbylljen e detyrimeve të mëparshme pa penalitete të mëdha.
Lehtësime për detyrimet e prapambetura: Paketa parashikon fshirjen e plotë të borxheve dhe kamatëvonesave për detyrime më të vjetra se 10 vjet. Për borxhet 5-10 vjeç, nëse shuma paguhet menjëherë, falet 50% e detyrimit; për pagesa me këste deri në 12 muaj, falen 25%. Bizneset me detyrime të 5 viteve të fundit do të përfitojnë falje të gjobave dhe kamatëvonesave, nëse shlyejnë shumën bazë.
Ministrja Ibrahimaj theksoi se kjo paketë është ndërtuar duke pasur parasysh sfidat që ka përballuar sipërmarrja në vitet e fundit, përfshirë krizën pandemike, tërmetin dhe rritjen e çmimeve globale.
“Synimi është të mbyllet një kapitull i vështirë për biznesin dhe të hapet një faqe e re bashkëpunimi, ku transparenca, korrektësia dhe besimi të jenë bazat e marrëdhënies mes shtetit dhe sipërmarrjes,” tha ajo.
