Kreu i Partisë Demokratike, Sali Berisha, ka reaguar për hetimet që SPAK ka nisur lidhur me tunelin e Llogarasë, duke shënjestruar hapur zv.kryeministren Belinda Balluku. Në një dalje për mediat, Berisha e cilësoi Ballukun si një nga personazhet më të errëta të korrupsionit në historinë e Shqipërisë.
“Se çfarë përfaqëson ajo në historinë e këtij vendi, mendoj se përfaqëson një nga figurat më të zeza të korrupsionit në gjithë ekzistencën e Shqipërisë,” deklaroi Berisha, duke iu referuar Ballukut.
Ai krahasoi rastin e tunelit të Llogarasë me aferën e Nesti Angonit, ndërsa akuzoi se pazari për ndërtimin e këtij tuneli është bërë jashtë kufijve të Shqipërisë. “Kështu që ai tuneli i Llogarasë është si puna e Nesti Angonit. Duhet të raportonte çdo muaj. Pazari është bërë në Ankara. Kompania ishte e dytë me 130 milionë euro, kompania me 180 dhe tani po shkon 230 dhe prisni ju. Se këta janë të paimagjinueshëm,” tha Berisha.
Në vijim, ai ndaloi edhe te çështja e inceneratorit të Tiranës, ku sipas tij, për pesë vite rresht, Belinda Balluku nuk ka dhënë asnjë raport mbi fatin e 130 milionë eurove të shpenzuara. “Djegësi i Tiranës, 130 milionë euro shkuan në gjykatë për dënime qesharake nga Skapi,” u shpreh Berisha.
Duke vijuar me akuzat, ai theksoi se dënimet kanë rënë mbi disa drejtorë të rangut të dytë, ndërsa Balluku, e cila sipas tij kishte përgjegjësinë ligjore për mbikëqyrjen e punimeve, ka qëndruar në heshtje. “Për djegësin e Tiranës u dënuan 2-3 drejtorë që kishin firmosur, ata kanë përgjegjësi për firmosje. Por nga momenti i firmosjes së tyre, nëse njësia e mbikëqyrjes së punimeve të djegësit do të kryente detyrën ligjore, që varej nga Lubi Balluku, që gjendej në ministrinë e saj si autoritet kontraktues, që asnjëri nga këta persona të mos mbajë përgjegjësi ligjore, që kishte përgjegjësi të raportonte për ndërtimin, fazën, ecurinë e punimeve.”
Berisha akuzoi më tej se pikërisht mosveprimi i strukturës së mbikëqyrjes ka shërbyer si mburojë për të mos lejuar hetimin e zyrtarëve të nivelit të lartë. “Në asnjë mënyrë Skapi nuk i merrte dot këta, se po t’i merrte këta ose do bëheshin të burgosur të paguar, do u paguante Belinda kaq milion, ose nuk do tregonin se nuk na ka lënë Belinda për të bërë mbikëqyrjen. Dhe se paratë janë dhënë sepse i ka marrë Belinda, minimumi. Unë them që paratë i ka marrë Rama, por Belinda duke e ditur që paratë i merrte Rama me Veliajn një pjesë, ajo heshtte. Kjo për 5 vite me radhë.”
Në këtë deklaratë, Berisha la të kuptohet se pas aferave korruptive nuk qëndron vetëm Balluku, por edhe vetë kryeministri Rama, ndërsa Balluku ka pasur rolin e asaj që e dinte gjithçka, por ka zgjedhur të heshtë.
