Kreu i Partisë Demokratike, Sali Berisha, ka reaguar ndaj deklaratës së bërë sot nga kryeministri Edi Rama, i cili u shpreh se mund të kalojë oqeanin “sa herë të dojë” për të shkuar në SHBA. Për Berishën, këto janë fjalë boshe që nuk vlejnë as për debat.
“Të më bësh mua të komentoj deklaratat e një njeriu që ka frikë dhe tmerr nga gazetari, nuk e di sa është etike t’i përgjigjem atij. Unë dhe ai dhe çdo politikan kemi detyrimin elementar ndaj qytetarëve të paraqitemi para gazetarëve,” u shpreh Berisha përpara mediave.
Ai theksoi se Rama është larg transparencës dhe llogaridhënies, duke e krahasuar sjelljen e tij me atë të ish-Presidentit amerikan Donald Trump: “Dje, pardje, lexova një artikull. Presidenti Donald Trump ishte paraqitur para gazetarëve, nga 20 janari deri tani, 20 herë më shumë se paraardhësi i tij në 4 vite. E kuptoni ju se me këtë qëndrim anti-transparencë dhe anti-media, nuk ja vlen ta konsiderosh për asgjë atë.”
Berisha ndaloi edhe tek ish-Sekretari amerikan i Shtetit, Antony Blinken, duke e përmendur në mënyrë të drejtpërdrejtë si person të diskredituar në SHBA. “Antony Blinken sot është non-grata në vendin e tij dhe uroj që të paraqitet para drejtësisë amerikane.”
Në vijim të deklaratës, Berisha aludoi se vizita e fundit e Blinken në Tiranë kishte si qëllim të ndihmonte Ramën për të zhdukur gjurmët e aferës McGonigal: “I them gjithashtu se nëse Blinkeni bëri një vizitë blic në Shqipëri, i paguar apo jo, për t’i mbuluar skandalin McGonigal Ramës, kazani po zien. Ai skandal nuk mbyllet kurrë. Kjo është përgjigja ime për sa tha.”
Berisha përmbylli reagimin me një tjetër thumb politik: “Kazani po zien dhe kjo është përgjigjja ime për sa tha Rama.”
