Është shtyrë seanca në Gjykatën e Posaçme mes biznesmenes Vilma Nushi dhe deputetes së Partisë Demokratike, Albana Vokshi, e paditur për shpifje lidhur me akuzat mbi koncesionin e Check Up-it.
Në një prononcim për mediat pas seancës, Vokshi deklaroi se gjyqi u shty me kërkesë të prokurorit, të cilin e ironizoi duke thënë: “kishte çështje më të rëndësishme se kjo që ka interes publik.” Deputetja shtoi se ndonëse kishte përgatitur një sërë provash për ta dorëzuar në seancë, nuk iu dha mundësia për shkak të kërkesës për ndërprerje nga prokuroria.
“Jam këtu, meqë nuk më lanë të jepja provat që kisha përgatitur sepse prokurori kërkoi që të ndërpritej seanca… Jam këtu për t’ju vërtetuar kush është shëndetësia falas,” deklaroi Vokshi para gazetarëve.
Ajo pretendoi se koncesioni i dhënë Vilma Nushit është i mbushur me shkelje dhe abuzime në çdo hap të tij, duke theksuar se sipas kontratës, kompania e Nushit duhej të ndërtonte 20 laboratorë me akses publik, por në realitet janë ndërtuar vetëm tre – dhe ato në pronë private.
“Vilma Nushi kishte kontratë për ndërtimin e 20 laboratorëve me akses publik, dhe të gjithë qytetarët të kishin akses të afërt për analizat. Janë ndërtuar 3 në pronën e saj private pa akses publiku që nuk i mbetet asgjë publikut pas 10 vitesh kur mbaron kontrata.”
Sipas saj, 10 laboratorë të tjerë janë nënkontraktuar në kundërshtim me marrëveshjen fillestare. “10 laboratorë i ka nënkontraktuar që është shkelje e kontratës. I përdorte këto laboratorët duke u dhënë 500 mijë lekë të vjetra në muaj.” Më tej, ajo shtoi se “për çdo analizë do t’u jap 600 lekë, 740 me TVSH. E dini sa paguhet Vilma për një komplet analizash? Merr nga shteti 18 840 lekë. Imagjinoi abuzimin për një analizë, më shumë se 11 mijë lekë.”
Vokshi gjithashtu deklaroi se afati i koncesionit ka përfunduar në janar, por Vilma Nushi vijon të paguhet pavarësisht mungesës së një amendimi kontrate: “Sot që flasim, a e dini ju që afati, periudha e koncesionit te check up ka përfunduar në mes të janarit dhe Vilma Nushi vazhdon e paguhet për një koncesion që nuk ka amendim kontrate.”
Deputetja bëri të ditur se është duke përgatitur një kallëzim penal të ri, që do të përfshijë jo vetëm Vilma Nushin, por edhe ish-ministrin Ilir Beqaj, ministren aktuale Ogerta Manastirliu dhe kryeministrin Edi Rama.
“Kemi përgatitur kallëzim tjetër dhe për Vilmën dhe Ogerta Manastirliun, Edi Ramën dhe Ilir Beqajn e këdo që ka shkelur ligjin” u shpreh ajo.
Duke e lidhur këtë çështje me zgjedhjet e 11 majit, Vokshi përfundoi me një paralajmërim: “Në 11 maj kjo merr fund, marrin fund këto koncesione abuzive dhe korruptive. Çdo para e shpërdoruar nga këta njerëz do të duhet dhe do t’i kthehet qytetarëve shqiptarë.”
Seanca e radhës në Gjykatën e Posaçme është caktuar për datën 24 prill, ora 09:00.
