“Ajo më solli disa rroba më pas ndaloi të flinte në shtëpinë time. Mëngjesin e 26 marsit e godita me thikë pasi pashë një mesazh që mori nga një djalë tjetër. E mbështolla trupin me celofan dhe më pas me një qese dhe e futa në valixhe. Nuk e kam paramenduar krimin". Këto kanë qenë disa nga fjalët e të riut me origjinë filipinase Mark Antony Samsonit, i cili rrëfeu vrasjen e 22-vjeçares shqiptare Ilaria Sula.
Corriere shkruan se Samson i bëri këto deklarata gjatë marrjes në pyetje, një seancë që mësohet se ka zgjatur rreth 5 orë këtë të premte. I dyshuari shpjegoi se e reja kishte shkuar në banesën e ish-të dashurit pasi do t’i kthente rroba. Ajo ishte vonuar deri në mbrëmje dhe për këtë arsye preferoi të flinte në shtëpinë e ish-it të saj për të shmangur marrjen e transportit publik në atë orë. Të dy i kishin dhënë fund lidhjes së fundmi pasi kishin pasur disa muaj me ulje-ngritje.
I ndihmuar nga avokati, 23-vjeçari i sapodiplomuar për Arkitekturë në Universitetin “La Sapienza” iu përgjigj të gjitha pyetjeve të prokurorit për të rindërtuar ngjarjet e natës midis 25 dhe 26 marsit si dhe për të sqaruar pikat ende të paqarta të vrasjes. Ai sqaroi orën e saktë të ngjarjes, rolin e prindërve të tij, si e ngarkoi trupin në makinë pasi e kishte futur në një valixhe dhe shpjegimin se pse e goditi vajzën e re 3 herë me thikë në qafë të cilat rezultuan vdekjeprurëse.
Pasi kishte pranuar krimin për hetuesit, Samsoni kishte preferuar të mos u përgjigjej shumë pyetjeve të prokurorit. Një marrje kaq e gjatë në pyetje erdhi pas daljes së autopsisë, e cila zbuloi detaje të tjera të vdekjes. Tashmë i takon gjykatës të vendosë më masën e tij të arrestit.
Megjithatë hetuesit janë duke i verifikuar disa nga deklaratat e Samsonit. Vëmendja e policisë dhe prokurorisë është zhvendosur ndërkohë tek mamaja e djalit. Pozicioni i gruas dhe disa deklarata të saj, i kanë vënë në dyshim hetuesit se dhe ajo mund të ketë pasur rol në fshehjen e vrasjes së kryer brenda shtëpisë. Vetë i riu këmbëngul se ka vepruar i vetëm. ©LAPSI.al
