Numri i të punësuarve në administratën publike ka kaluar 184 mijë persona në fund të vitit 2024. Shifrat e raportuara nga INSTAT flasin për një rritje me afro 3900 punësime, rreth 6 muaj para zgjedhjeve, ndërkohë që numri i tyre mund të ketë pësuar ndryshim edhe në muajt e parë të 2025, pak para se qeveria të vendoste në zbatim të Kodit Zgjedhor pezullimin e të gjitha rekrutimeve.
Fryrja e administratës në prag të zgjedhjeve është një fenomen i përsëritur, pasi edhe gjatë viteve të kaluara është vënë re një shtim i pazakontë. Për shembull, në vitin 2021, kur u zhvilluan zgjedhjet e përgjithshme parlamentare, punësimi në sektorin shtetëror u zgjerua me rreth 8 mijë persona, ose me 4% brenda një viti.
Për të ndaluar përdorimin e punësimit në shtet për favore politike, Kodi Zgjedhor përcakton të ndalohet çdo procedurë rekrutimi nga institucionet që rekrutojnë punonjësit e tyre përmes Kodit të Punës.
Qeveria njoftoi në fillim të marsit se procedurat e nisura do të duhet të përfundojnë, por asnjë procedurë e re punësimi në ministri, në institucionet e varësisë, por edhe në ato shoqëri aksionere me kapital shtetëror nuk mund të zhvillohen pas datës 3 mars.
Të dhënat e hershme tregojnë se në fushatat zgjedhore rekrutohen më shumë punonjës nga ndërmarrjet me kapital shtetëror, sidomos ndërmarrjet e ujësjellësit dhe pushteti lokal./ Ora News
