Kur Joan Monfort shkrepi foton e Lionel Messit me një fëmijë për një kalendar bamirësie pothuajse 17 vjet më parë, ai e dinte se i futbollisti me flokët e gjata do të kishte një karrierë fantastike në futboll. Ai nuk mund ta imagjinonte dot të njëjtën gjë edhe për djalin e vogël.
Foshnja në fotot – të cilat janë bërë virale – nuk është askush tjetër veçse Lamine Yamal, i riu spanjoll, i cili në moshën 16-vjeçare po premton aq shumë sa që tashmë po krahasohet me të mëdhenjtë. Më i riu që ka luajtur për Spanjën, ai u bë lojtari më i ri ndonjëherë që shënon në një Kampionat Evropian.
Fotoja e harruar prej kohësh nga viti 2007 u rishfaq pasi babai i Yamal e postoi në Instagram javën e kaluar me tekstin: "Fillimi i dy legjendave".
Monfort, 56 vjeç, i cili punon si fotograf i pavarur për Associated Press dhe të tjerë, tha se fototi u bënë në dhomën e zhveshjes së vizitorëve në Camp Nou të Barcelonës në vjeshtën e vitit 2007, kur Lamine Yamal ishte vetëm disa muajsh.
Lojtarët e Barcelonës pozuan me fëmijët dhe familjet e tyre për një kalendar si pjesë e një lëvizjeje bamirësie vjetore nga gazeta lokale Diario Sport dhe Unicef.
Monfort ishte në krye të seancës së fotove – dhe ndodhi që Messi u bashkua me familjen e Lamine Yamal. Nëna e tij, e cila është nga Guinea Ekuatoriale, është pranë Messit dhe foshnjës në një nga fotot.
“Ne e bëmë kalendarin me ndihmën e Unicef-it,” tha Monfort. “Kështu që Unicef bëri një lotari në lagjen Roca Fonda në Mataró ku jetonte familja e Lamine. Ata u regjistruan në shortin për të bërë foton e tyre në Camp Nou me një lojtar të Barçës. Dhe ata fituan lotarinë.”
Nuk ishte një detyrë e lehtë, kujton ai, kryesisht sepse Messi nuk ishte i sigurt se si të ndërvepronte me foshnjën, e cila ishte në një vaskë plastike për xhirimin.
“Messi është një djalë mjaft introvert, ai është i turpshëm”, tha Monfort. “Ai po dilte nga dhoma e zhveshjes dhe befas e gjen veten në një dhomë tjetër të zhveshjes me një vaskë plastike të mbushur me ujë dhe një fëmijë në të. Ishte e ndërlikuar. Ai as nuk dinte si ta mbante në fillim.”
Messi ishte 20 vjeç në atë kohë dhe konsiderohej si një talent i madh, por do të duheshin disa vite para se të shpërthente si lojtari më i shquar i gjeneratës së tij për Barcelonën dhe Argjentinën. Ashtu si Messi, Lamine Yamal ka kaluar nëpër akademinë e njohur të të rinjve të Barcelonës, La Masia. Pavarësisht moshës së tij, ai ka qenë një nga lojtarët më të mirë të Spanjës në Euro 2024, ku ekipi i tij luan të martën në gjysmëfinale me Francën. Ai do të mbushë 17 vjeç të shtunën, një ditë para finales në Berlin.
Monfort, 56 vjeç, nuk e kishte idenë se ishte Lamine Yamal në ato foto të vitit 2007 derisa një mik i dërgoi mesazh teksa ata filluan të shfaqeshin në internet. Ai ka pasur një karrierë të gjatë si fotograf sportiv që nga viti 1991, duke ndjekur Barcelonën në mbarë botën, por tha se kurrë nuk e ka përjetuar këtë nivel emocioni rreth asnjë prej fotove të tij. “Është shumë emocionuese të shoqërohesh me diçka që ka shkaktuar një ndjesi të tillë,” tha ai. “Të them të vërtetën është një ndjenjë shumë e bukur.”/ Përshtatur nga The Guardian
