Chelsea pas disfatës së keqe në debutimin në Ligën e Kampionëve nga Dinamo Zagreb ka shkarkuar trajnerin Thomas Tuchel, i cili vetëm një vit e pak muaj më parë ngriti në qiell Ligën e Kampionëve me Blues. Ka peshuar, përveç humbjes në tokën kroate, fillimi belbëzues i londinezëve në Premier League, si dhe një dhomë zhveshjeje që, sipas tabloideve angleze, nuk e ndiqte më trajnerin gjerman. Prandaj, pronësia e re amerikane ka vendosur të ndryshojë dhe emri i zëvendësuesit është tashmë gati: Graham Potter, trajneri i Brighton, do të ulet në stolin e Stamford Bridge. Por ndryshimi nuk do të jetë aspak i lirë...
Ikën Thomas Tuchel, vjen Graham Potter. Ky është ndryshimi në pankinën e Chelsea që do të zyrtarizohet brenda 24 orëve. Blues kanë identifikuar te ish-trajneri i Brighton emrin e duhur për t'u fokusuar për të ardhmen dhe pas bisedimeve brilante që patën të mërkurën me shefin Todd Boehly edhe dyshimet e fundit janë shuar. Megjithatë, ardhja e Potter në Stamford Bridge nuk do të jetë pa dhimbje, pasi Chelsea duhet t'i paguajë Seagulls një dëmshpërblim prej rreth 23 milionë euro për ta liruar atë. Dhe kjo nuk është e gjitha, sepse Tuchel ka gjithashtu të drejtën e një pagese të bollshme largimi.
Blues duhet të transferojnë rreth 17 milionë euro në llogarinë e Thomas Tuchel pas shkarkimit të papritur të mërkurën. Ose më mirë, 15 milionë do të shkojnë për ish-trajnerin, ndërsa dy të tjera do të përfundojnë në xhepat e stafit të tij. Klauzola në kontratën e trajnerit gjerman me klubin londinez flet shumë qartë. Duke i mbledhur me 23 që do t'i paguhet Brighton për të liruar Potter, nëse shifrat e publikuara do të konfirmoheshin, shpenzimi shkon në 40 milionë euro.
