LAJM I FUNDIT/ Gjykata Kushtetuese shpall vendimin për shkarkimin e Metës
Njëkohësisht me këtë gjykim për thelbin, Gjykata i ka dhënë nga ana tjetër, të drejtë kuvendit të legjistraturës së shkuar në procedurat që ka ndjekur për procesin e shkarkimit. Ndonëse këshilltarët ligjorë të Kreut të Shtetit e mbështetën në mënyrë të veçantë mbrojtjen e tyre, pikërisht te shkeljet e rënda që sipas tyre ishin kryer nga parlamenti që nga momenti i shqyrtimit të kërkesës së deputetëve që vunë në lëvizje parlamentin, deri në marrjen e vendimit, Kushtetuesja ka hedhur poshtë pretendimet e Metës se komisioni hetimor ishte ngritur në shkelje të afateve, se parlamenti i paplotë ishte i paligjshëm dhe se "Legjislatura X e Kuvendit, bazuar në parimin e vazhdimësisë institucionale, ka legjitimitet për të përfaqësuar Legjislaturën IX të tij. "Legjislatura IX e Kuvendit, ka pasur legjitimitet substancial, në vlerësim të momentit të konstituimit të Kuvendit, zëvendësimit të deputetëve, numrit të përgjithshëm të deputetëve, mungesës së vendimeve të organeve kompetente për të deklaruar parregullsinë apo pavlefshmërinë e zëvendësimit të mandateve dhe mundësisë së kësaj Legjislature për të arritur kuorumet e nevojshme, si dhe tërësisë së ligjeve dhe vendimeve të miratuara" thuhet në njoftimin e gjykatës. Presidenca është treguar e pakënaqur me këtë vendim. Sipas saj komisioni hetimor ishte i paligjshëm ndaj menjëherë zëdhënësi i saj Tedi Blushi ka reaguar: “ZERO SURPRIZË për Presidencën! Kjo çështje as nuk duhej të kishte filluar! “, shkruar Blushi. Ata që janë kritikë me aktivitetin politik të Metës duket se nuk e kanë pritur mirë vendimin. Gazetari Mero Baze ka shkruar në Facebook-un e tij menjëherë pas vendimit: “Gjykata Kushtetuese paska vendosur që Ilir Meta është president normal. Kjo e shpëton Ilir Metën dhe dy muaj më shumë në zyrë, por ky vendim ka vrarë përfundimisht institucionin e Presidentit të Shqipërisë. Në atë zyrë tani bë çfarë të duash pasi të mbron historia e Ilir Metës. Madje dhe po je aratisur nga çmendina e je strehuar aty”. Ende nuk dihet se si është votuar mes shtatë gjykatësve kushtetues, as nëse do të ketë një vendim pakice të atyre që u renditën pro shkarkimit. Por, kjo gjë pritet të zbardhet në ditët në vijim sepse nga sot Kushtetuesja ka një muaj kohë për të bërë publike arsyet e vendimit të marë. ©Lapsi.al
