Nuk kishte provuar në këtë sezon shijen e humbjes, duke marrë 9 rezultate pozitive radhazi, deri sa erdhi derbi kryeqytetas me Dinamon. Nëse bardheblutë e shehit deri në këtë pikë i kishte shërbyer si shtysë euforia e rezultateve dhe kreu i klasifikimit, tani është koha që 25 herë kampionët të tregojnë ADN-në e tyre, duke u demonstruar të aftë të ngrihen në këmbë edhe pas një humbje si ai 2-0 që i vë gjithashtu në rrezik objektivin e parë sezonal.
Një ndeshje të cilën bardheblutë e luajtën me një lloj mendjemadhësie, pa i hequr asnjë meritë Dinamos e që e cuan dëm në pjesën e parë, pa mundur dot të rikuperojnë në të dytën, ku provuan e shtynë shumë, aq sa për të treguar se gjërat në këtë ndeshje mund të shkonin edhe ndryshe. Hakmarrja është një pjatë që shërbehet e ftohtë thonë, por Tirana nuk e ka luksin, ose kohën të presë që gjërat të ftohen, sepse derbi, përsëri kundër Dinamos, propozohet sërisht në kampionat të shtunën. E aty lojtarët duhet ti tregojnë Shehit, e tekniku drejtuesve, se kjo disfatë e ndërtuar me neglizhencën e pakujdesinë e një skuadre që vetëm fitonte, ishte një rastësi.
Do të vlejë shumë më tepër madje se tre pikët në renditje, sepse fillimisht do ti jepte pushtetin absolute në kryeqytet e më pas do të shërbente si një paralajmërim për kthimin në raundin e dytë të Kupës, aty ku duhen dy gola për të barazuar e tre për të fituar. Mision i vështirë, por jo i pamundur për Tiranën, por më parë Shehi duhet të fillojë të kujdeset për nervat e të tijve, sepse për të tretën ndeshje radhazi detyrohet të luajë me një lojtarë më pak, duke filluar nga i kuqi për Najdovskin kundër Partizanit, Tolin në Klasiken me Vllazninë e së fundmi në Kupë ai që parapriu skuadrën në dushe ishte Hoxhallari.
