Igli Tare e Lazio mund të mos jenë gjithnjë bashkë, jo sepse Drejtori Sportiv shqiptar ka pakënaqësi në klubin e Lotitos, por sepse në adresë të tij vazhdojnë të mbërrijnë oferta, me klube të rëndësishme që kërkojnë shërbimet e ish-sulmuesit. Pas Milan, që e kishte seriozisht por me ofertën kuqezi të refuzuar nga Tare, është radha e një tjetër klubi kuqezi, por këtë herë në Gjermani që avancon interesimin.
Sipas zërave që vijnë nga Gjermania, Eintracht Frankfurt është në gjurmët e Igli Tares për sezonin e ardhshëm. Klubi gjerman, me shumë mundësi do të zëvendësojë drejtorin sportiv Fredi Bobic sezonin e ardhshëm e Frankfurt duket se ka hedhur sytë në shtëpinë bardhekaltër.
Sipas Frankfurter Rundschau, në fakt, drejtuesit kanë piketuar Igli Taren, si një emër i besueshëm, por edhe për një motiv tjetër. Drejtori Sportiv i Lazios e njeh mirë futbollin gjerman, duke qenë se ka luajtur si lojtar, përpara se të transferohej në Itali. Tare ka shumë klube që e ndjekin, por e ardhmja e tij mund të vazhdojë të jetë bardhekaltër, sidomos nëse Simone Inzaghi rinovon kontratën.
