Pas miratimit nga Qeveria për rihapjen e stadiumit për 25% të kapacitetit të tij dhe zyrtarizimit të dritës jeshile nga Uefa, mund të kalohet në planin organizativ. Pas 22 prillit, kur faza e tretë do të mbyllet për mundësinë e rimbursimit të biletave të blera tashmë dhe do të ketë një vlerësim të saktë të biletave të shitura, Uefa - raporton Gazzetta dello Sport - do t'u shkruajë blerësve duke i informuar ata se konfirmimi i vendeve do të bëhet përmes shortit, me shumë mundësi mes fundit të prillit dhe fillimit të majit. Por bileta nuk do të mjaftojë për të hyrë në stadium. Dritë jeshile për ata që kanë marrë vaksinën, për ata që kanë kaluar tashmë Covid me një test serologjik jo më herët se një datë të caktuar ose për ata që kanë një tampon të shpejtë me rezultate negative në 24-48 orë para ndeshjes.
Olimpico në Romë do të presë katër ndeshje të Euro 2020, tre të Italisë së Mancinit në grupin A (Itali-Turqi në 11 qershor, Itali-Zvicër në 16 qershor dhe Itali-Uells në datë 20) plus një çerek finale në 3 korrik. Katër sektorë do të jenë të hapur: Tribuna Monte Mario, Tribuna Tevere, Curva Sud dhe Curva Nord. Rregullat e hyrjes në stadium do të përcaktohen nga FIGC dhe CTS së bashku, me qëllim për të shmangur grumbullimet. Kështu, do të ketë rrugë të ndryshme për të arritur në vendet e caktuara dhe gjithashtu kohë të ndryshme, me një vend të saktë kohor për secilin tifoz.
