Projekti Pirlo po shkon drejt fundit të linjës. Rreziku për të mos arritur një vend në Champions League (që do të ishte një tragjedi e vërtetë ekonomike për klubin), por mbi të gjitha mungesa e një loje të besueshme dhe të dallueshme, e bën rikuperimin me Napolin ndeshjen klasike për brenda ose nga jashtë për trajnerin bardhezi. Sipas asaj që bën të ditur Il Giornale, Presidenti Agnelli e ka parë derbin me Massimiliano Allegrin, në shtëpinë e tij në Forte dei Marmi. Asgjë e pabesueshme pasi nuk është mister që të dy janë miq.
Por është mjaft e qartë se mund të lindin të gjitha llojet e hamendësive në momentin që ekziston një projekt në diskutim dhe tifozët i fryjnë zjarrit në mediat sociale për të sjellë Maks përsëri në stolin e Juventusit. I sigurt është vetëm fakti që, në rast të një rezultati negativ të mërkurën, Pirlo do të shkarkohet. Në këtë rast, duke përjashtuar hipotezën e një provizori, trajneri i vetëm që mund të mbërrijë menjëherë është Allegri. Marrëdhënia me presidentin është një pikë fillestare për planifikimin e së ardhmes.
Në rast se, nga ana tjetër, do të vazhdohet me trajnerin aktual deri në fund të sezonit (por cikli i tij i konsideruar i mbyllur me apo pa Ligën e Kampionëve), klubi mund të përqendrohet në dy emra që janë në qendër të diskutimeve të drejtuesve bardhezinj prej kohësh. I pari është ai i Zidane, për të cilin janë interesuar disa herë. Zizou ka qenë një lojtar vendimtar në të kaluarën, fitoi gjithçka me Realin dhe mund të tundohej për një kthim në Torino në tentativë të provojë veten në një kontekst tjetër. Trajneri tjetër që ata pëlqejnë është Simone Inzaghi, tashmë në fletoren e Juventusit edhe kur kërkohej një pasues i Allegrit e gjithashtu edhe për pas Sarrit. Fakti që ai nuk ka rinovuar ende është parë nga shumë si një tregues se është në pritje për një telefonatë prestigjioze.
