Konferencën e presidentit Ilir Meta në të cilën kreu i shtetit foli mbi sjelljen e tij në zyrat e FRD-së si dhe mbi incidentin e djeshëm në Elbasan, kryeministri Edi Rama e ka quajtur si një tregues i thjeshtë që në 25 prill qytetarët do duhet të zgjedhin mes tij dhe drejtësisë. Nëpërmjet një postimi në rrjetin social Twitter, Rama nuk i ka ndalur akuzat për kundërshtarët e tij politikë duke thënë se votat për LSI dhe PD, do të shkojnë për Metën dhe Berishën që janë kundër reformës në Drejtësi. Rama e ka distancuar nga diskursi i tij kryedemokratin Lulzim Basha, pasi sipas tij ky i fundit “thjesht ha përshesh”.
“Sa herë Ilir Meta del, flet, bërtet, shan, lajthit, aq herë e bën të qartë se zgjedhja e 25 prillit është një zgjedhje mes drejtësisë dhe Ilir Metës. Çdo votë për LSI është një votë kundër Drejtësisë dhe çdo votë për PD është një votë për Ilirin e Saliun; Luli thjesht ha përshesh”, shkruan Rama.
