Kombëtarja e Iranit la një mesazh falënderimi në dhomat e zhveshjes të stadiumit SoFi në Los Anxhelos, duke shprehur mirënjohjen për mikpritjen e qytetit gjatë Kampionatit Botëror.
Gjesti erdhi pas barazimit 0-0 me Belgjikën, një rezultat që i mban gjallë shpresat e iranianëve për t’u kualifikuar në fazën me eliminim direkt.
Los Anxhelosi ka qenë deri tani qyteti pritës për të dyja ndeshjet e Grupit G të Iranit. Megjithatë, skuadra nuk ka qëndruar në SHBA, por ka udhëtuar për çdo ndeshje nga baza e saj në Tijuana të Meksikës, për shkak të kufizimeve të veçanta që autoritetet amerikane kanë vendosur për qëndrimin e ekipit në territorin amerikan.
Këto kufizime kanë bërë që një pjesë e stafit dhe zyrtarëve të federatës iraniane të mos lejohen të hyjnë në SHBA. Zyrtarët amerikanë kanë deklaruar se kushtet e udhëtimit të ekipit mbeten në shqyrtim, ndërsa vazhdojnë diskutimet për një lehtësim të mundshëm të disa prej kufizimeve ekzistuese.
“Nga Persia e lashtë e mijëra viteve më parë deri te Irani i qytetëruar i ditëve të sotme, shpirti i Iranit mbetet i gjallë dhe i palëkundur”, shkruhet në mesazhin e shkruar me dorë, të publikuar nga Federata Iraniane e Futbollit.
“Faleminderit Los Anxhelos për mikpritjen tuaj.
Erdhëm në Los Anxhelos me krenari, garuam me nder dhe largohemi me dinjitet.”
Special message from the national team in the locker room to Iranians and people around the world
— رامین رضاییان (@Ramin_Rezaian_) June 21, 2026
Message from the national team on the locker room board:
?From ancient Iran, thousands of years old, to today's civilized Iran, the spirit of Iran has remained alive and strong.… pic.twitter.com/mvW8au8cg1
Në vijim të mesazhit, futbollistët falënderuan edhe tifozët iranianë, të cilët dhanë “zemrën, zërin dhe shpirtin” për ekipin gjatë dy ndeshjeve, ndërsa e mbyllën letrën me një thirrje për paqe, respekt dhe miqësi mes të gjitha kombeve.
Trajneri i Iranit, Amir Ghalenoei, ka kritikuar vazhdimisht kufizimet e vendosura ndaj ekipit, duke deklaruar se skuadra e tij është përballur me vështirësi që asnjë kombëtare tjetër pjesëmarrëse në Botëror nuk i ka përjetuar.
Irani, i cili barazoi 2-2 me Zelandën e Re në ndeshjen e parë të zhvilluar po në stadiumin SoFi, do të luajë ndeshjen e fundit të grupit kundër Egjiptit në Seattle.
Mesazhi i ekipit u publikua pavarësisht faktit se himni kombëtar iranian u fishkëllye sërish para ndeshjes me Belgjikën. E njëjta atmosferë armiqësore ishte regjistruar edhe në ndeshjen e parë ndaj Zelandës së Re.
Spikeri i FIFA-s në stadium u kishte kërkuar tifozëve të “duartrokasin për paqen”, por reagimi ishte i vakët dhe mbështetja për këtë mesazh mbeti e kufizuar. Irani nisi fushatën e tij në Kupën e Botës vetëm pak orë pasi presidenti amerikan Donald Trump njoftoi se ishte nënshkruar një marrëveshje paraprake paqeje mes SHBA-së dhe Iranit për t’i dhënë fund luftës mes dy vendeve.
Skuadra mbërriti në Los Anxhelos nga baza e saj stërvitore në Tijuana të Meksikës pikërisht në momentin kur u shpall marrëveshja për përfundimin e konfliktit. Ndërkohë, jashtë stadiumit, rreth 300 deri në 500 protestues u mblodhën përpara ndeshjes, duke valëvitur pankarta dhe flamuj kundër qeverisë iraniane. Ata deklaruan se nuk dëshironin të hynin në stadium, pasi kjo, sipas tyre, do të interpretohej si mbështetje për Teheranin, ndërsa protestonin kundër regjimit dhe shtypjes së protestave pro-demokracisë në Iran.
