Gjermania siguroi matematikisht kualifikimin në fazën e 1/16-ave të Botërorit 2026, pasi përmbysi 2-1 Bregun e Fildishtë në ndeshjen e dytë të Grupit E. Heroi i sfidës ishte Deniz Undav, i cili realizoi dy gola në pjesën e dytë dhe i dha skuadrës së Julian Nagelsmann tri pikë të arta, duke e ngjitur në krye të grupit me pikë të plota.
Takimi i zhvilluar në stadiumin BMO Field në Toronto nisi i ekuilibruar. Gjermania gjeti rrugën e rrjetës në minutën e 21-të me Aleksandar Pavlović, por arbitri e anuloi golin për faull të mesfushorit ndaj portierit Yahia Fofana. Bregu i Fildishtë përfitoi nga momenti dhe kaloi në avantazh në minutën e 30'. Pas një depërtimi të bukur të Yan Diomande nga krahu i majtë, Franck Kessie shënoi nga afër për rezultatin 1-0.
Në pjesën e dytë, lëvizjet e Julian Nagelsmann ndryshuan rrjedhën e ndeshjes. I futur nga stoli, Deniz Undav barazoi shifrat në minutën e 68', duke finalizuar një krosim të saktë të Nadiem Amiri. Kur gjithçka dukej se po shkonte drejt barazimit, Undav goditi sërish në minutën e 94', duke shënuar golin e fitores pas një asisti të Felix Nmecha dhe duke vulosur suksesin 2-1 të Gjermanisë. Falë kësaj fitoreje, Gjermania siguron matematikisht kualifikimin në 1/16-at e finales të Botërorit 2026. Në ndeshjen e fundit të grupit do të përballet me Ekuadorin, ndërsa Bregu i Fildishtë do të kërkojë fitoren ndaj Curaçaos për të mbajtur gjallë shpresat për kualifikim.
