Gjashtë pikë në dy ndeshjet e fundit duken një arritje optimale për Kukësin e Hallacit dhe në fakt kështu është, nëse nuk do të ishte për faktin që kundër Bylis, blutë vërtetë fituan, por vuajtën shumë dhe i bëri të vlejë vetëm eksperienca.
Në “Elbasan Arena”, në ndeshjen e vlefshme për javën e 16-të në Kategorinë Superiore, Kukësi pati startin më të dobët, duke pësuar inisiativën e kundërshtarit. Bylisi krijoi disa raste të rrezikshme, ndërsa në minutën e 26’, ishte Stojanoviç që kaloi ballshiotët në avantazh. Kuksianët rrezikuan madej të kapitullonin, përpara se të barazonin në rastin e parë të ndeshjes, që erdhi në minutën e 39’, tregues i qartë për ndeshjen e dobët të bluve.
Ibraimi barazoi rezultatin, duke i dhënë një shans që të tijtë e shfrytëzuan në pjesën e dytë. Por jo pa u trembur më parë nga traversa e goditur nga Carkanji. Në të 56, Eze zgjidhi situatën me golin e përmbysjes, që e ngjit Kukësin në kuotën e 23 pikëve në vendin e 4-t, ndërsa Bylisi mbetet në kuotën e 12 pikëve në vendin e parafundit.
