Shqiptari Dritan Abazoviç, që drejton partinë URA në Malin e Zi dhe ka 4 deputetë në mazhorancën e re, do të marrë dikasteret e sigurisë të qeverisë së ardhshmne; Ministrinë e Brendshme, ministrinë e Mbrojtjes dhe agjencitë e shërbimit sekret.
Këtë opsion e kanë kundërshtuar fuqishëm partitë proserbe, por në fund ka qenë presioni i madh ndërkombëtar që ka ndikuar që ato të tërhiqen. Ende nuk dihet nëse në krye të këtyre dikastereve do të ketë ndonjë shqiptar etnik, pasi deri tani Abazoviç ka thënë se do të delegojë ekspertë dhe jo politikanë në postet e reja ministrore.
NATO dhe vendet e Perëndimit kanë qenë kundër emërimit të ndonjë politikani të lidhur me Moskën në krye të agjencive të sigurisë. Marrëveshja përfundimtare mbi programin dhe vendimet e personelit është planifikuar për 30 Tetor.
Krerët e Demokracisë së Re Serbe dhe Partisë Socialiste të Popullit mund të jenë zëvendëskryeministra. Kurse radikalët e Frontit Demokratik pritet të marrin nënkryetarin e Kuvendit. Megjithatë partia radikale në koalicionin që drejton kryeministri i ri, Lëvizja për Ndryshim bëri të ditur se udhëheqësi i tyre Nebojsha Medojeviç duhet të emërohet për një pozicion në sektorin e sigurisë. Fronti Demokratik do të drejtojë ministrinë e Arsimit. ©LAPSI.al
