Finale europiane pas 10 vjetësh. Antonio Conte e arrin misionin me golat dhe performancat monumentale të Lautaro Martinez e Romelu Lukaku. Inter mposht 5-0 Shakhtar Donetsk e fluturon në finale të Europa League, ku të premten në 21 gusht do të luajë trofeun me Sevilla. Ndeshje e jashtëzakonshme e djemve të Conte, të udhëhequr nga Lu-La, autorë të dy dygolëshave.
Inter e nisi në mënyrën e duhur gjysëmfinalen e Europa League, duke arritur të marrin avantazhin në minutën e 19 me Lautaro Martinez. Në fakt ishte një gabim i portierit Pyatov në rivënien në lojë që favorizoi Barella: krosimi ishte perfekt për argjentinasin që me kokë shënoi golin e 1-0, duke e bërë edhe më të thjshtë për italianët.
Shakhtar paguajti mbi të gjitha gabimet e bëra vetë, sepse vetëm dy minuta pasi Moraes humbi një rast të pafalshëm përballë Handanovic, Inter shënoi të dytin në minutën e 64. D'Ambrosio gjeti kohën e duhur për të shënuar me kokë në zhvillimet e një goditje këndi, duke qetësuar Conte në pankinë.
Me një Lautaro në formë brilante, Inter siguron kalimin e Inter në finalen e Europa League me golin e tretë kundër Shakhtar Donetsk. Goli i 21 sezonal për Lautaro Martinez, që tregoi kualitetin e tij të jashtëzakonshëm në përdorimin e topit: kontroll me të majtën e goditje me të djathtën, duke mos i lënë asnjë mundësi Pyatov. Shumë gabime për ukrainasit, sepse nga një i tillë lindi edhe aksioni që solli dygolëshin personal të argjentinasit.
E në 12 minutat e fundit shfaqjen e merr Lukaku, duke shënuar dy gola, që e cuan rezultatin në 5-0. Katër minuta pas Martinez, në të 78, në listën e golashënuesve u fut edhe belgu, që shënoi golin e katërt në asist pikërisht të argjentinasit, ndërsa në të 85 tregoi gjithë forcën e pabesueshme fizike, duke lënë pas mbrojtësin në sprint dhe duke e dërguar topin nën këmbët e Pyatov. Goli i 10 europian për Lukakun, që vendos në shënjestër tashmë Sevillan.
