14- vjeçarja E.L. që prej tre ditësh rezultonte e zhdukur është gjetur në Fushë Krujë. E mitura, që u denoncua dhe kërkohej dëshpërimisht nga familjarët u gjet në një banesë në Fushë Krujë.
M.L., babai i 14-vjeçares Ergita, ka qenë personi që e ka gjetur të bijën në Fushë Krujë, pasi është lajmëruar përmes një telefonate. Persona të paidentifikuar e kanë parë adoleshentën dhe kanë telefonuar të atin.
Prej tre ditësh, Policia e Shtetit, po e kërkonte dhe nuk kishte rënë në gjurmët e saj. Ajo po kthehet nga duart e të atit në shtëpinë e saj. E.L. është shpallur e humbur nga familja e saj, të cilët denoncuan se 3 ditë më parë, rreth orës 23:30 të natës kanë humbur kontaktet me të.
Nga kamerat e sigurisë ajo ishte parë në një hotel në Lushnje, gjë që e deklaroi edhe babai i të miturës përpara kamerave sot. Shkaqet e largimit nga banesa dhe arsyet që e kanë çuar në Fushë Krujë, mund t’i shpjegojë vetëm vetë vajza.
