Rreth një e pesta e pacientëve të shtruar me Covid-19 në spitalet gjermane nga fundi i shkurtit deri në mes të prillit kanë vdekur. Sidomos të rrezikuar janë pacientët që kanë nevojë për frymëmarrje artificiale.
Nga analiza e të dhënave të 10,000 pacientëve të konfirmuar si të infektuar me Covid-19 që janë trajtuar në 920 spitale gjermane nga 26 shkurti deri më 19 prill rezulton se një në çdo pesë pacientë kanë vdekur nga sëmundja.
Po ashtu sipas studimit pacientët që kishin nevojë për frymëmarrje artificiale kanë shumë më tepër gjasa që të vdesin, sesa ata që nuk kanë nevojë për frymëmarrje artificiale.
Tek pacientët që kishin nevojë për frymëmarrje artificiale vdekshmëria ishte 53 përqind, kurse te ata që nuk kishin nevojë 16 përqind.Të vdekur edhe nga grupmoshat e reja
Në rastet e pacientëve – sidomos të atyre mbi 80 vjeç – që kishin nevojë për frymëmarrje artificiale vdekshmëria ishte 72 përqind, pra mjaft më e lartë se e atyre që nuk kishin nevojë. Po ashtu shkallë e lartë vdekshmërie u konstatua tek pacientët që kishin nevojë për dializë për shkak të mosfunksionimit të veshkave.
Sipas të dhënave rezulton edhe se vdekshmëria tek meshkujt e trajtuar në spital ishte 25 përqind, kurse tek gratë 29 përqind. Pavarësisht nga gjinia vdekshmëria më e lartë konstatohet tek pacientët e moshuar – 27 përqind i përkisnin grupmoshës nga 70 deri në 79 vjeç, 38 përqind ishin mbi 80.
Megjithatë sipas dr. Christian Karagiannidis, drejtor i Klinikës për Sëmundjet e Mushkërive në Këln-Merheim, edhe nga grupmoshat e reja ka pasur si të infektuar edhe të vdekur, prandaj masat mbrojtëse duhet të vazhdojnë të respektohen prej të gjithëve.Grupet më të rrezikuara
Sipas studimit pacientët që vuajnë nga sëmundje të zemrës, si aritmia, apo nga diabeti kanë më shumë të ngjarë të kenë nevojë për frymëmarrje artificiale sesa ata që nuk vuajnë nga sëmundje të tilla. Analiza tregoi se 43 përqind e pacientëve me sëmundje zemre dhe 39 përqind e atyre që vuajnë nga diabeti kishin nevojë për frymëmarrje artificiale.
Studimi i kryer nga Instituti shkencor i AOK (WIdO), Shoqata Ndërdisiplinare Gjermane e Reanimacionit (DIVI) dhe Universitetit Teknik të Berlinit, u botua në revistën mjekësore “The Lancet Respiratory Medicine”./DW
