Rilindja po prish edhe një traditë jo vetëm shqiptare, se me shumë vlerësojmë kur dikush na bën nder sesa kur e bëjmë vetë. Këtë anomali e ilustron shkëmbimi i mjekëve në kohë të covid 19. Sot ishte Ministrja e Shëndetësisë dhe Mbrojtjes Sociale, Ogerta Manastirliu, autoriteti më i lartë që ka pritur në Aeroportin “Nënë Tereza” delegacionin e mjekëve Italian, i cili do të ofrojë ndihmë për përballimin epidemisë për vendin tonë.
Ndërsa në mars kur ne çuam mjekë dhe infermierë në Itali gjithçka u organizua me pompë, në aeroport doli vetë kryeministri Rama, delegacioni shqiptar u vesh me paisjet mbrojtëse sikur virusi shpërndahej në Rinas, (shihni si janë veshur normal italianët) dhe tevevizionet transmetuan njëkohësisht fjalimin e kryerilindasit.
“Kur disa muaj më parë ju gjendëm pranë Italisë mike në një moment tejet të vështirë, nuk e kishim menduar se do të na e kthenit ndihmën kaq shpejt” – u shpreh Manastirliu e cila nuk la pa përmendur nderin e marsit.
Në fakt zakoni shqiptar e donte që pritje më madhështore të bëhej kur na ndihmojnë të tjerët, sesa kur i ndihmojmë ne ata. Kryeministri mund të kishte dalë për të pritur dhe jo për të përcjellë. Por me sa duket regullat e shtetit hë propagandës janë ndryshe.
Përbërja e grupit italian të ndihmës
Task forca e Emergjencave Civile italiane është e përbërë nga shtatë ekspertë një mjek urgjence, një anestezist dhe nga një funksionar i Emergjencave Civile të Qarkut të Puglia-s, nga një mjek dhe një infermier urgjence i Qarkut të Lombardisë, një mjek infeksionist i Qarkut të Lazio-s dhe nga një infermiere urgjence e Qarkut të Piemontes, e cila është nga Shqipëria.Krahas grupit të mjekëve dhe të infermierëve në Aeroportin e Rinasit ka mbërritur edhe një sasi prej 500.000 maskash kirurgjikale në ndihmë të vendit tonë.
©Lapsi.al
