Lulzim Basha doli në konferencë pasi Partia Socialiste u deklarua e gatshme të plotësojë kërkesën e opozitës parlamentare për hapjen e listave zgjedhore, çka do ti japë fund koalicioneve parazgjedhore.
Përpara mediave ai deklaroi se me këtë lëvizje, Rama ka prishur në esencë marrëveshjen e 5 qershorit të arritur me opozitën në rezidencën e ambasadës Amerikane.
“Falenderoj përfaqësuesit e medias që sot para syve tuaj keni pasur njeriun më të tmerruar nga zgjedhjet e ardhshme që Shqipëria ka njohur në 30 vite. Tmerri dhe ankthi i Ramës për humbjen e zgjedhjeve sot ka arritur një majë papërgjegjshëmërie që se ka pasur as Ramiz Alia në ditët e tij të fundit.
Një nga rekordet që do të thyejë është ajo e një kryeministri në ikje më të tmerruar se kushdo. Në esencë sot ai ka prishur marrëveshjen e 5 qershorit për të cilën u investuan forcat politike me ndërmjetësimin e BE, SHBA dhe Britanisë së Madhe në këtë marrëveshje ishte qendrore arritja e dakordësisë për reformën zgjedhore, kusht për hapjen e negociatave të Shqipërisë me BE”, - tha Basha.
Kujtojmë se nga BE dhe SHBA është kërkuar votimi i marrëveshjes së 5 qershorit, pa ndryshimet e fundit të Ramës.
