Shkrimtari dhe diplomati Besnik Mustafaj u shpreh sot tek News 24, kundër projektit për shembjen e Teatrit Kombëtar, dhe tha se asnjë vendim nuk mund të merret pa u shprehur Gjykata Kushtetuese, ku çështja është dërguar për shqyrtim.
Mustafaj tha se deklarata e Veliajt për ulje dhe bisedime me artistët që janë në mbrojtje të teatrit, është e pasinqertë, pasi Rama dhe kreu i Bashkisë tashmë e kanë marrë vendimin.
Këto do të ishin bisedime pa vlerë, vetëm sa do të rrisnin tensionet, tha Mustafaj.
Ish-ministri i Jashëtm u shpreh se me prishjen e Teatrit, Shqipëria humbet një godinë historike dhe humbet në imazh në arenën ndërkombëtare. Sipas tij, turpi, në rast përplasje me artistët dhe aktivistët që mbrojnë Teatrin, do t’i ngelet qeverisë dhe policisë.
Tirana, pohoi, Mustafaj, po shndërrohet një qytet pa identitet, ndryshe nga shumë metropole në rajon.
Duke analizuar situatën dhe pasojat nga pandemia, Mustafaj tha se rënia më e madhe ekonomike që parashikohet për vendin tonë, është përgjegjësi e qeverisë dhe keqqeverisjes. Plani i masave të Ramës, shtoi Mustafaj, del se është një flluskë sapuni, që ose nuk është realizuar, ose nuk ka pasur asnjë efekt.
